【本報訊】多間傳媒曾報道，飲食界立法會議員張宇人曾指「侍產假一日都唔應該有」的言論，被指涼薄兼無良僱主，張宇人昨否認曾發表此言論，直斥無綫新聞主播張文采「創造」這句話，自嘲自己說話能「賣紙」，對新聞自由有貢獻。議會陣線議員朱凱廸指，連建制派報章亦曾報道張宇人拒收回言論，反問張若沒有發表相關言論，又何來拒絕收回？
張宇人昨於辯論將侍產假增加至7日的修正案時，表明反對有關修訂，又否認說過「侍產假一日都唔應該有」，「呢句說話，正式嚟講，係來自無綫電視時事節目《新聞透視》主持，佢都係姓張，叫張文采，不過佢好樣過我好多，該節目透過剪接，喺我說話嘅中間，加入張文采嘅聲音，說我話『一日都唔應該畀』，好多報章都引用咗呢句」。
曾被指拒收回言論
張宇人指要向張文采「致謝」，稱對方「創造一個令人好易入耳嘅soundbite （精警說話）」，「用幾個字概括咗十幾分鐘嘅訪問，令人忽略前文後理」，又指自己說話「幾賣得吓報紙」，「感覺自己對新聞自由都有啲貢獻」，但強調不應將不支持增加侍產假的僱主標籤為無良。
本報翻查該節目內容，是由節目旁白引述張宇人指「侍產假一日都唔應該有」，張一直未作澄清。
議會陣線朱凱廸則引述建制派報章《頭條日報》曾報道指張宇人拒絕收回「侍產假一日都唔應該有」言論，故他要求張宇人澄清，既然否認發表這番話，又何來拒絕收回？張宇人最後未有澄清。
■記者姚國雄
|
鍾意就快D Share啦！
|
|
|
