劉嘉玲、莊思敏、向太陳嵐與兒子向佐等，今日齊到尖沙嘴出席一個品牌展覽，近日嘉玲姐趁好天氣經常行山，讚嘆香港有很多美麗風景的行山徑，不遜於瑞士或日本等地：「我之後想行蚺蛇尖，搵埋發仔（周潤發）一齊行挑戰佢。」嘩，向高難度挑戰喎！
數月前嘉玲開始兼任老公梁朝偉經理人一職，負責幫佢接job，但嘉玲姐笑言對方要求多多、好鬼麻煩：「佢好多嘢唔肯接，我起勢幫佢收咗十幾個劇本，佢都推晒，真係唔易做，又會俾說話你聽，安排出席活動只去半個鐘。」
問嘉玲究竟偉仔呢個藝人算唔算曳？佢話：「好差將我身份模糊咗，又唔好意思收番佢錢，收咗錢仲煩，面色仲難睇，平時都客氣，依家當正我『阿四』。」嘉玲姐希望快啲搵到合適嘅經埋人幫佢：「我諗人哋聽到佢個名都驚，幫佢推工作要好婉轉，佢係要搵啱自己嘅工作，錢引誘唔到佢。呢個係我最欣賞佢嘅地方，有好高尚品德。」
|
鍾意就快D Share啦！
|
|
|
