馬浚偉近年愛演舞台劇，今年5月演完《偶然。徐志摩》，隨即宣佈明年1月新舞台劇《生前約死後》面世，馬仔指該劇是紀念亡母逝世20周年。編寫劇本時，馬仔幾度泣不成聲，寫不下去……
馬仔的母親於99年離世，令他一度患上抑鬱和驚恐症，多年來病發逾千次，每次都在生死邊緣徘徊。兩年前，馬仔決心完成劇本，更找來與母親神似的顧美華演出，舞台上再遇「媽媽」，皆因有未說完的話……
撰文︰祖李
攝影︰林德雄
馬浚偉說他花了20年才悟出生死真諦，儲備足夠的勇氣為自己療傷。他說︰「媽媽離世對我打擊好大！劇本已經醞釀五年，但之前寫到某啲位，太痛！寫唔到落去。呢兩年我情緒控制到，邊喊邊寫，起碼我畀自己喊。」
錯過最後一面
馬仔六歲時，母親患癌，進出醫院多年。母親臨去世前，醫生勸病人做手術，否則性命捱不到一星期，當時媽媽不肯做手術，馬仔傷心得哭了起來，媽媽見狀就簽紙做手術，可惜手術成功蘇醒四小時後，卻因急性肺炎離世，令馬仔將過錯歸咎自己︰「媽媽離世嗰陣喊唔出，內疚、痛楚一齊湧埋嚟。所有嘢都覺得自己唔好，係咪唔應該勸佢做手術、點解凌晨等佢瞓咗就走，錯過見佢最後一面……」
在馬仔記憶裏，媽媽永遠高貴優雅︰「細個睇美華姐拍《似水流年》覺得佢好似阿媽，我媽媽好靚、優雅，佢生癌點痛都唔會發脾氣，死嗰陣不過48歲，好後生。」馬仔當時得悉媽媽患絕症後，性格變得內向︰「我好少同人提及家事，中三就兼職賣雪糕自給自足，唔想為屋企製造麻煩。因為情緒冇地方宣洩，媽媽離世我咪崩潰囉。」
呼吸困難昏倒
母親離世後，馬仔得了抑鬱症，藥物不能完全解決，惟有靠酒精、工作麻醉自己，皆因醉後可以放聲痛哭︰「當時我有事屋企冇人知，我鍾意飲酒，因為飲完可以盡情喊。」馬仔說有次飲完酒胃痛難當，才決心戒酒︰「我唔係怕死亦唔怕病！但我要長命過老竇，佢身體好好，我要同佢鬥健康。」
近年他戒了煙、酒，抑鬱症康復，但驚恐症仍偶爾發作，要靠藥物控制，他表示從99年開始發作至今逾千次，每次都在鬼門關徘徊︰「驚恐症好得人驚，每次發作時，身體機能同意識都話畀你知會死，冇預兆㗎，好似有人喺後面嚇你，然後心跳加速，跟住就手震、頭暈、呼吸困難、手腳麻痹後就昏倒。死亡唔恐怖，恐怖在你以為就死但死唔去。」馬仔有感因抑鬱症浪費了八年光景，現在的他分秒必爭，寫劇本、讀咖啡、讀工商管理，事業多方面發展，明年會開咖啡店，做埋烘焙、批發，向商界強人進發。
金庸讚最似康熙
馬浚偉93年以歌手身份出道，卻因拍劇而為人熟悉，98年馬仔孖陳小春拍劇《鹿鼎記》，馬仔飾演康熙卻被傳媒揶揄「着起龍袍不似太子」，一直令他耿耿於懷。他說︰「當年好慘，演技未成熟，劇集一出就被抨擊，好唔開心，好在後來得到好大鼓勵，金庸先生讚我係咁多藝員中最似康熙嘅扮演者。以前好在意負面新聞，𠵱家就一笑置之，每個人都有難處，如果是手民之誤，產生誤會咪用時間去證明囉。」
馬仔更表示演皇帝很刺激，尤其今年在劇集《宮心計2深宮計》中飾演李隆基︰「李隆基好現實同人性化，佢高招在唔表露出嚟，大家就覺得佢奸！演嗰陣每次對手同我講對白，我都算緊佢。」
場地提供︰富豪九龍酒店
化妝及髮型：RickyKAZAF
|
鍾意就快D Share啦！
|
|
|
