年少輕狂！
藝人謝霆鋒日前接受TVB娛樂新聞台節目《StarTalk》主播許文軒專訪，大談創作廣東新歌感受。霆鋒直言從未離開過樂壇，他以煮食作比喻：「我從來冇失去對於音樂團火，只係睇吓會醞釀幾耐，之前一直忙拍電影同美食嘅嘢，一路冇得分身，以前我係一團紅火周圍辣，依家係藍火較為集中，藍火一定熱過紅火，但我仲覺得自己係新人，因為我唔安於現狀，想追求進步。」
對於再回香港開騷，他表示一直都想，但不想隨便推出唱片或開演唱會：「因為唔想淨係集體回憶，亦唔希望交行貨，希望可以喺戶外做個嘉年華形式嘅騷，唔想個個坐定定睇我唱搖滾。（再開騷會唔會掟爛結他？）年青嘅時候係應該要做啲年青嘅嘢，只要唔係傷害人，鍾意做咪做，我又唔係掟個結他落你個頭度。（老實講早年掟結他，心痛嗎？）好心痛！通常都係結他走音，或者耳機有啲噪音而影響發洩。有樣嘢好笑，每一支畀我破壞嘅結他，完騷後我會走番出個台度執，將啲屍骸執番落個盒，我仲有keep住嗰啲爛晒嘅結他，望番佢哋一整晚係有後悔同慨嘆！」
至於因工作四海為家的他，問到可有感到疲累時，他笑言反而很享受這種攰：「因為我鍾意呢份工作，你唔鍾意好難做到廿幾年。如果你問我邊度最舒服，我會答喺飛機上最舒服，雖然得一個窗口同一份飛機餐，但已成為我最有歸屬感嘅地方，因為我喺飛機花嘅時間已經超越咗我喺屋企花嘅時間，而且嗰度有最私人嘅空間。如果我喺香港同北京會有好多人搵我，但喺飛機上就冇人搞我，佢哋會畀我休息，我可以做自己鍾意嘅事。」
來源 source: http://hk.on.cc
|
鍾意就快D Share啦！
|
|
|
