話咁快，唔夠三個月2018年就過去，要講本年度最特別嘅「細」紀婚禮，我Nuts哥同好多網民一樣，力推大叔黃德斌個婚禮。早排佢同拍咗十三年拖嘅女友Joyce結婚，冇婚紗、冇禮服、冇龍鳳鈪、冇金豬，只喺酒店Coffee Shop搞個自助餐派對招呼親朋，五皮嘢搞掂。比起其他名人明星扮晒嘢，用錢搭夠講排場、晒命有幾多金豬巨鑽、用幾多荷蘭靚花做布景嘅所謂世紀婚禮，唔使踏上100呎水晶Catwalk天橋或360度旋轉舞台，黃德斌呢個婚禮夠晒簡單利落，有血有肉得多，真正代表咩係平淡而幸福。雖則結婚係人生大事，大極都係兩個人嘅事，你情我願簽個字就夠，邊個話藝人結婚就一定好似做騷咁做？
CV厚過電話簿
結得遲同早，觀點與角度，查實嫁得早不如嫁得好，風水佬都會攞錯羅庚滾搞你十年八年，嫁得唔好，早嫁又有咩着數？冇錯，佢性格係門字加個心，悶！不過身為男神嘅佢，對另一半猶如男臣，聽從跟從順從，抬得忍得又擔得，幫太太搬貨睇舖、去超市買餸入貨，加上佢CV厚過電話簿，閱歷無數，好過印印腳等運到自怨自艾嗰啲男人啦。正如佢早排部戲其中一句對白話齋：「錢銀同女人喺面嗰層，入肉最深係尊嚴。」乜都係假，尊嚴最重要。佢從來冇話講理想，唔係話佢甘願做一條鹹魚，而係講理想前，更加要講生存，你估佢又係十歲生日有十皮嘢收咁爽咩？順流逆流，照頂照受，有力，就去托貨做搬運囉，人哋覺得自己有身形有台型，咪去做Model囉，就係咁簡單。
爆肌熟男殺血路
入行前佢做過地盤、跟車、搬運，牛高馬大天生有副好身形，被睇中做男模，做做吓入電視台，路人甲、犯人乙、警察丙，有咩做咩，冇諗過憑一個角色一飛沖天去，踏踏實實去做，連武師都撈埋。個天都要畀啲刺激你，做二打六做足本分夠稱職又點？當年被安排拍三級片，露埋股上完床，點知就接大信封冇得續約，惟有拍拍籮柚繼續走，轉去做幕後。時來運到，冇幾耐又被召返去拍《真情》做「越南」，唔算大紅大紫，起碼出街都開始有人識，之後憑爆肌熟男形象同累積多年嘅演技殺出血路，左一句男神，右一句型男，抵晒！
五十知天命，就算知天命時先做到男一，對佢嚟講唔係大件事，情願外闖搵其他機會。撈咁多年，最特別係佢依然保持自我，唔應酬、唔Social，就算連微博、Ig都唔會玩，當唔少明星真係連條毛都要影埋出嚟擺上網博宣傳時，你可以話佢固執唔妥協，但係人云亦云，嘩眾取寵做小丑，淪為人家嘅笑柄， 好過癮咩？唔宣傳唔出位，係咪冇戲拍先？
----------------------------
東網巨星開咗ig喇，大家快啲follow
https://bit.ly/2JjSVcr
|
鍾意就快D Share啦！
|
|
|
