大台女主播出名多靚女，遠嘅唔再講，就以最近常見嘅為例，講樣有越睇越四正嘅麥詩敏。今年先得26歲，喺鏡頭前專業有台型，鏡頭後就變返做一個青春可愛少女，而且佢身高1米7，一對長腿令唔少巴打投晒降；
講身材有同樣都係26歲嘅梁凱寧，外表亦都唔差，不過比起靚樣，佢呼之欲出嘅上圍更加吸引眼球，加上佢穿搭風格好多時都係窄連身裙，仲要喺腰間綁多條帶收細腰部，令佢本來已經突出嘅上圍更添逼爆嘅視覺效果，令人睇天氣報告聽到「雨勢有時頗大」時，都會不自覺點頭贊同。
當然，大台靚女主播又點只上述兩位，嚟緊仲有賴凱靖、周可茵、李慧怡呢啲二十出頭後起之秀，真係可以令男士個個睇到心心眼，爭相交表做兵；女士們都可能羨慕又妒忌，眼紅佢哋眾多裙下之臣。
不過，有句說話講得好啱，「你睇我好，我睇你好」咋！其實唔少女主播靚麗外表、女神形象背後，咪一樣遭遇爛桃花。好似麥詩敏咁，網上流傳話佢有個「好勁」嘅男朋友架。邊忽勁就唔清楚，但就有人話不時喺老蘭見到佢條仔食女。
麥詩敏呢單無圖無真相齋噏，又真係講唔過去嘅，咁講下人人都叫佢BB嘅陳嘉倩啦。2017年揀著個陳志遠拍拖，點知男友被揭有案底，又爆出個正印女友朱婉禎出嚟。雖然陳嘉倩火速宣佈分手，但朱婉禎又喊晒口咁拎出嘉倩BB嗌陳志遠做老公嘅箍煲短訊，令佢成為全城鬧爆嘅第三者。嘉倩BB就解釋拍拖期間從來唔知道有朱婉禎嘅存在，自己都係受害者被蒙在鼓里，之後又聲稱被恐嚇，以人身安全為由報警處理。不過，陳志遠之後承認係賤男，仲反指嘉倩BB一早知自己係小三都摏個頭埋去，認真峰迴路轉。
陳嘉倩捲入桃色風波未算慘，最陰公都係張文采。同羅鈞滿拍拖4年，男方出軌偷食空姐Sylvia，張文采都忍，選擇原諒，然後做個跟得女友，男友踢波佢就喺場邊打氣，愛得高調搞到大台勒令要低調處理，但張文采都一於少理。後來羅鈞滿喺韓國影人裙底闖禍，都係張文采親自飛過去接濟。雖然共過患難，可惜羅鈞滿不久後再被踢爆繼續偷會空姐Sylvia，張文采至此先知原來佢哋一直未斬纜，加上男友唔道歉更冷冷地講咗句：「我哋冷靜下先。」張文采終於徹底死心。好彩，佢最終都搵到好歸縮，本月更同消防員男友拉埋天窗，做個幸福人妻。
所以話羨慕咁多做乜吖，主播幾靚都好，始終係人，唔係吸風飲露就得。感情上，佢哋同大家都一樣，喺人生路上都總有機會遇上賤男，或者因為佢哋靚，中招機率更加大都唔定。
來源 source: http://nextplus.nextmedia.com
|
鍾意就快D Share啦！
|
|
|
