何韻詩與容祖兒近日一張同框合照，竟然惹來極大迴響，事關12年祖兒與阿詩的舊愛劉浩龍（師兄）撻着，令阿詩被指一度嬲爆斷絕來往。六年恩怨一筆勾銷，對於這張世紀合照，祖兒前晚大方表示跟阿詩「從來都係好友。」而屢傳已和祖兒分手的師兄昨就以「好普通」來形容破冰合照，似是有意淡化祖兒及阿詩再次升溫的關係。
何韻詩、容祖兒和劉浩龍曾經friend到三人行，不過，阿詩的舊愛劉浩龍12年突然與祖兒拍拖，令阿詩跟祖兒擘面絕交，二人六年來即使一同出席活動都沒有合照。不過，隨着「龍兒戀」近年屢傳分手，令祖兒及阿詩關係似乎出現轉機。
指從來係好友
黃耀明上周四在東京開騷後，上載一張東京街頭合照，相中驚見祖兒及阿詩，隨即更成為網民熱話，阿詩更回應叫大家「冷靜啲」。前晚祖兒到澳門出騷，在後台被問到是否跟阿詩重修舊好時，祖兒似有備而來地說：「其實從來冇唔好囉！我諗關係上冇太大問題，喺成件事裏面我自己覺得冇嘢，同埋緣份囉，所以對我嚟講喺咁嘅場合見到係好自然嘅事。」祖兒似與阿詩統一口徑，表示外界反應過激：「影到張相，大家開心，我覺得觀眾亦都好唔冷靜。」
| | （左起）容祖兒、劉浩龍及何韻詩三人曾經是親密好友，連私下去玩都愛三人行。資料圖片 | 祖兒12年於網上撰文認與師兄拍拖，有傳因此令阿詩與二人反面。資料圖片 |
之後祖兒似乎想轉移視線，忽然講起陳年舊事：「呢張相實在太多關係喺度，但其實最開心係呢三位女歌手，我、千嬅、阿詩，大概十年前，我哋曾經一齊喺頒獎禮裏面等攞獎。」覺得現在跟阿詩是否好友？祖兒說：「從來都係好友，冇唔好友，你想我哋好差？」祖兒強調未曾跟阿詩反面：「完咗騷大家都有去慶功，當然有傾偈，我哋真係唔係仇人嚟㗎。」阿詩曾在社交平台取消關注祖兒，祖兒解釋：「大家唔好諗多咗，做朋友梗係有唔同階段。」不過問到祖兒，兩人不開心的階段是否已成過去，祖兒就未有正面回應：「總之就OK啦，亦都會係好OK嘅，好難得有班朋友有咁多回憶，大家敍舊話當年，過程係開心。」
師兄：好普通
有傳師兄當時亦身在日本，不過當問到師兄行蹤，祖兒就扮儍：「好似係喎，其實大家睇到啲新聞有自己聯想，我講大家未必信，我唔講大家猜想，我覺得唔需要解釋咁多。」問到覺得三人是否可以跟以前一樣是好朋友，祖兒說：「冇嘢冇可能㗎，係咪先，你哋想嘅話，驚你哋受唔住呀，哈哈哈！」阿詩與師兄仍是朋友嗎？她回答說：「除咗家人咪朋友囉！」
至於另一當事人的師兄昨在紅館綵排慈善音樂會，提到女友祖兒跟阿詩的「世紀合照」，師兄說似在淡化二人的關係：「我覺得好普通，成班朋友去支持明哥，呢張相好緊要，係代表我哋好團結，香港嘅歌手一齊去支持明哥。」不過當時身在東京的他卻未有捧明哥場：「冇呀！我同朋友去咗食飯，message咗明哥話去唔到喇！good show」至於有否跟祖兒阿詩遇上，師兄說：「冇撞到喎！我淨係撞到楊千嬅。」
採訪：雷曹
攝影：林賓尼
|
鍾意就快D Share啦！
|
|
|