恭喜恭喜！雄仔做人夫喇！今日一大早，53歲韋家雄就帶埋兄弟團，去太子一間酒店迎娶「銀行之花」、細佢近20年嘅女友鄧楚雅（Keynes），恭喜恭喜！
自爆噚晚緊張到瞓唔著嘅韋家雄，心情緊張呀，噚晚已經成晚瞓唔著。一對新人身穿中式裙褂，早上十一點半落樓接受傳媒訪問，新娘子當然都一齊啦。兩人仲好合作，「自動波」錫足三十秒俾大家影。新娘子一身金器，目測起碼四、五對龍鳳鈪，一派喜氣。
韋家雄話自己噚晚瞓唔到，新娘子都係，佢話：「我都係好緊張！」點知韋家雄突然搭嘴：「不過依家終於接咗新娘落嚟喇，我好開心好興奮！所有需要嘅傳統儀式都做足喇。」至於接新娘嗰關，韋家雄形容係「跳下舞、Fing下波，食下wasabi咁」，都唔太難喎。愛的宣言真係三字經？韋家雄話：「我好認真咁講I love you。」
問新娘子Keynes滿唔滿意呢個老公呢？佢輕聲說：「滿意。」俾幾分？「110分！」韋家雄又搭嘴：「嘩！唔使咁多，我俾番10分你啦，大家滿分，100分」兩人又話婚後打算去泰國台灣度蜜月，依家已經放緊假，一直放到本月底。
韋家雄就梗係開心啦，但佢兄弟就……你唔信，問楊明。
楊明話，呢排真係好多人結婚，又有好多人搵佢做兄弟，佢仲自嘲做兄弟做到變「老屎忽」，頭先喺樓上都係應下景食下wasabi咁，同班兄弟手執花球跳大媽舞：「主要都係氹下老人家開心，老人家仲要求我哋跳足兩分鐘。我哋平時台慶跳十秒都要綵排兩星期」佢又話成日俾人催婚，但女友莊思明反而就冇催佢囉。
|
鍾意就快D Share啦！
|
|
|
