在大台處境劇《愛．回家》扮演「程志美Terry」嘅李偉健，現年39歲嘅佢今日成家立室，跟太太阿寶結束15年愛情長跑，晚上在銅鑼灣擺喜酒大宴親朋，晚上近9點，一對新人預備入場儀式，新郎哥李偉健都手機不離身，百忙中接聽傳媒電話道喜，李偉健興奮表示：「o依家要出場行禮，好開心！」即匆匆掛線。
有份做兄弟嘅李霖恩話李偉健好長情，同太太相識15年，但對方好怕羞，知有傳媒都匿埋唔做訪問，所以兄弟頂。問到婚禮有乜感人或趣事？佢話：「又冇乜，不過Terry本身份人都好搞笑，所以深情到好似做戲咁，對朋友又好。」問到送乜禮物？佢表示都係人情啦。
吳雲甫因為忙於工作，嚟到畀低人情就走了，吳雲甫表示：「我識佢咁耐都係呢個女朋友，佢好驚女朋友㗎，今日佢算威，我嚟到得佢一個喺台上面，問佢老婆呢？佢話喺新娘房，我話嚟打個招呼擺低禮就走，佢話捉埋老婆出嚟影相，應該係我識佢咁多年唯一一次，佢直接指令老婆。」
婚宴由合作拍攝《愛》劇嘅李霖恩、周嘉洛、阮政峰擔任兄弟，「大小姐」林淑敏、「送水輝」許家傑及阮政峰做幫手做司儀搞氣氛，胡渭康和鄭世豪則上台唱歌贈慶，有份去飲嘅邵佩詩在社交網貼咗李偉健兩公婆嘅甜蜜錫錫相，喜氣洋洋。
精選娛聞，喺晒《娛果》
http://fb.com/appledailyent
|
鍾意就快D Share啦！
|
|
|
