藝人徐濠縈出席時裝活動。被問到14歲女兒陳康堤（包包）被拍得情竇初開拍拖，阿徐笑說：「尋日朝早一擘大眼，就有好多朋友好心畀段新聞我睇，其實我知佢拍拖，冇嚇親，我嚇親係點解你哋手足會收到風佢喺邊個球場比賽？你知我哋係禁止去睇佢比賽㗎嘛，點知畀你哋影到，仲要跟足全程，影埋佢朋友。（咁包包有冇唔開心？）我擔心影響人哋家長多啲，始終小朋友冇必要出鏡，報道有輕輕打格，我有叫包包問候番佢嘅朋友。」她坦言有見過女兒的男朋友幾次，老公陳奕迅就未見過。問到老公是否要有心理準備先見對方？阿徐表示：「佢OK，好開放嘅，你睇佢個樣就知，超級開放，咁呢個時候係應該拍拖嘅。」
叫阿女檢點啲
由於阿徐一身綠色打扮，記者笑她開綠燈，她笑說：「係呀，咁佢已經唔係小學生，已經係中三，有自己喜歡嘅人好正常。（你對個男仔印象如何？）好似講人哋唔係咁好。（報道話佢似彭于晏喎？）咁咪好靚仔？咁我見過佢真人，都靚仔嘅。（包包係咪好有眼光？）我同個女都好有眼光，最緊要大家開心，大家要對佢哋高抬貴手，佢哋唔識，嗰日都唔知畀人拍，淨係話有人影住，以為係其他家長。（有冇叫佢小心啲？）一早叫佢小心啲，我意思係唔好着住校服畀人影，公眾地方要檢點啲，其實都係正常社交活動，普通小情侶咁樣。」
想五代同堂
問到會否覺得時間過得很快，轉眼囡囡就拍拖？她說：「係呀，係我啲朋友接受唔到多啲，佢哋始終仲係停留緊包包係梁浸浸咁嘅年紀，其實佢已經係少女，包包有少女心事啦。（有心理準備10年後做埋婆婆未？）乜我要諗呢啲㗎喇？其實有朋友都同我講過，睇下我有冇呢個福分啦。（有埋個孫咪似三姊妹？）嘩，咁係值得開心喎，咁老公咪做公公？五代同堂，更有福份，哈哈，會唔會扯得太遠？其實10年後都仲係早婚，好快就有埋曾孫，哈哈。」
|
鍾意就快D Share啦！
|
|
|
