演戲演足近半個世紀，但從來未做過主角，有人會抱怨「點解唔係我」？
62歲嘅吳浣儀卻「認命」，自知天生面圓圓，個樣生得惡同巴渣。19歲初入行就被選中演《朱門怨》嘅三少奶，34歲在《孖仔孖心肝》中做劉青雲同周星馳嘅阿媽。吳浣儀日前在尖沙咀接受《蘋果》專訪，表示從不介意演媽媽角色﹕「我個樣生得成熟，唔介意，有得我做就得。以前星仔話『你大我8年，點做我阿媽呀？』我話『是但啦，我一路都做人阿媽㗎』其實星仔仲大過青雲兩年，咪又係做青雲細佬。」
最後部劇好成功，浣儀姐覺得星仔應記一功，佢話﹕「好多戲係佢即場改，改埋你嗰份。我哋冇分前輩後輩，最重要搞好件事，觀眾出嚟鍾意。以前啲劇個底好，執少少就得。但現在成個劇本都冇得搞，咪算囉，照做囉，我聽佢哋(TVB人)講，哈哈。」
浣儀姐坦言今時今日好少睇電視劇，佢笑笑口話﹕「我冇睇呀，sorry，睇唔落，有次唔好講邊套啦，因為自己老友喺度做(演)，我捧吓場，但睇咗一場就唔好意思熄咗機。」如今會挑選好劇本，即使只有幾場戲亦在所不計，佢話﹕「我仲係好鍾意演戲，後生真係為搵食，現在仔女都大，我就可以選擇，一、兩日戲都唔緊要，最重要有得發揮。」
2015年憑《五個小孩的校長》嫻姨一角，入圍《金像獎》最佳女配角；今年再拍由梁家樹監製嘅網劇《蝕日風暴》飾演儍姑一角，令佢過足戲癮。浣儀姐話﹕「睇劇本，個角色儍得嚟係正常嘅，我都唔知佢幾時正常、幾時儍，咁就帶動一宗謀殺案，係儍姑見到許紹雄被人殺咗，但又講啲唔講啲，引導Chilam去追查。雖然戲份唔多，但角色有用，唔係坐喺度唔知做乜。」佢話導演給予好大自由度，可以設計造型，令角色更立體﹕「我喺街見到人化濃妝，深藍色眼蓋，恤行個頭，你睇到佢行徑係有啲唔正常，我就話不如用呢個啦。坦白講，現在真係唔喜歡拍電視劇，太流水作業，一味快，畀意見都話你唔好搞咁多嘢喇，快啲搞掂收工。但拍電影或網劇，分分鐘都係錢，佢哋都想度好個角色。」
採訪﹕嵐山
攝影﹕陳俊強
場地提供﹕Teppanyaki Kaika (The ONE)
精選娛聞，喺晒《娛果》
http://fb.com/appledailyent
| 吳浣儀經常演媽媽角色，但從不抱怨，因為真心喜歡演戲。(無綫電視截圖) | | |
| | | |
|
鍾意就快D Share啦！
|
|
|
