吳浣儀曾兩度離開無綫，直認以前好任性，佢話﹕「拍完《朱門怨》叫做紅咗，但無端端又搵番你做reception、伙記，條氣唔順，又拍緊拖，之後去咗佳視(佳藝電視)做到佢執笠。咁當時男友，即老公就話不如結婚啦，咪結囉。」
24歲結婚後，吳浣儀育有三女一子，除照顧子女，仲與老公一齊打理旅行社，直至87年重返無綫拍《真情》，之後又因亞視高薪挖角所以離開。可惜好景不常，丈夫不幸患肺癌，數年間令家財幾乎盡散，吳浣儀要問朋友借錢度日，除鮑起靜，還有羅蘭借出20萬元解困，佢話﹕「因為醫個病使好多錢，當年真係連樓都抵押埋，最細個仔得12歲，女又未出身，冇一條數係清清楚楚。」
唯苦過，方知甜。如今吳浣儀可以享清福喇，因為四名子女均學有所成，四個都喺香港大學畢業，浣儀姐一臉自豪話﹕「大女做社工，二女揸飛機，7月剛升做機長喇(微微一笑)，三女讀獸醫，四仔就係電訊公司做，職位都幾ok啦。」而二女仲生咗個得意囝囝，浣儀姐一提起孫仔就好開心﹕「幾醒目，工人話有婆婆演戲細胞，好多表情，見人唱歌又學你唱，哈哈哈。」
問到係咪一位稱職媽媽？浣儀姐嘴角一笑﹕「呢樣唔使諗，一定係！老婆唔敢講，因為我唔識煮嘢食，老公叻我好多。」浣儀姐話多年來拍劇，日夜癲倒，但無論幾忙都會督促子女讀書，佢話﹕「冇人鍾意讀書，所以真係要自細逼。成個小學我睇㗎，我拍嘢都會搖控，默書就用錄音機錄晒，叫佢哋撳出嚟聽住默，同佢哋講我拍完幾夜都會返嚟睇。我係幾惡嘅人，係嚴母，好臭脾氣，現在收晒火。」
有四名孝順子女，浣儀姐現在可以安享晚年，所以「做又得，唔做又得」，佢話﹕「夠使咪得囉，每人畀啲，發仔(周潤發)話齋撻住15蚊人字拖都幾舒服呀。」不過，當記者問浣儀姐攞四名子女合照，佢都好尊重子女話﹕「佢哋細個讀書唔鍾意我去接返學放學，因為媽咪演戲，問你都算，仲問埋媽咪啲同事，講多兩句就唔鍾意。但讀到大學，全部同學仔都知，明白呢個係職業。」
採訪﹕嵐山
攝影﹕陳俊強
場地提供﹕Teppanyaki Kaika (The ONE)
精選娛聞，喺晒《娛果》
http://fb.com/appledailyent
| 四名港大畢業的子女，吳浣儀可說老懷安慰。(受訪者提供) | | |
| | | |
| | | |
| | |
|
鍾意就快D Share啦！
|
|
|
