正所謂「相嗌唔好口」，郁手郁腳就更加唔啱，深水埗呢對疑似情侶，周一晚喺深水埗上演「街頭霸王2018」，女方步步進逼，男方喺讓賽情況下節節敗退，當大家以為總有一個會瞓低，賽事先會結束，呢個時候竟然嚟個反高潮，和氣收場，一齊走人！令一班圍觀嘅街坊好失望！
讀者陳小姐當晚8點幾，將架車駛入大南街等人，當時已經見到一對年約二十幾歲嘅男女嘈緊交，「佢哋應該係情侶關係，女嘅要對方畀錢佢，男嘅唔肯，大約一分鐘後就打起上嚟。」喂！求財啫，唔係求氣喎！喺陳小姐拍攝嘅片段見到，揹住背包嘅兇狠姐非常進取，一開波就不停發動攻勢，起腳向肥哥哥嘅私處連踢3吓，嘩！突然要唱返句「心，突然的隱隱痛！嗚嗚！」而事實上，肥哥哥中招之後，痛到彎晒腰，真係男人最痛算這種！但兇狠姐似乎毫不心軟，乘勝追擊，又踢又打，加埋扯髮打頭，肥哥哥只係間中擋格推開對方，可能係本住「好男不與女鬥」嘅原則，男嘅節節敗退，只有大叫「黐線㗎你！」「放手呀！」有乜令佢喺男人最痛嘅時刻，都唔還手？係愛呀，哈利！
陳小姐話，肥哥哥之後拎起電話，對住電話講「我俾人打呀！」但街頭賽事進行咗差不多10分鐘，都冇差人到場，所以都唔知佢有冇報警，途人就企埋一邊，一面食花生，一面睇好戲，並冇勸交，正當陳小姐以為兇狠姐會使出絕招K.O.對手時，呢個時候，竟然……停……手？對男女仲要一齊走人，原來床頭打交床尾和，只需要一秒鐘。家啲後生嘅行為，真係令小記諗唔通，睇唔透。
你敢爆，我敢獎！ 立即WhatsApp《蘋果》24小時爆相爆片熱線或致電：63836568
|
鍾意就快D Share啦！
|
|
|
