【新增內容】
鍾欣潼（阿嬌）同「醫界王陽明」賴弘國（Michael）今日喺九龍一間酒店擺喜酒，鄭希怡（Yumiko）、容祖兒、蔡卓妍(Sa)做姊妹，李克勤、何超蓮、薛凱琪、譚耀文、汪明荃同羅家英夫婦、蘇永康夫婦、孫耀威同陳美詩夫婦、張智霖同老婆袁詠儀都有到，真係星光熠熠呀！
繼Joey擺咗價值近十萬元嘅結婚蛋糕之後，薛凱琪都有更新ig story，見到阿嬌換咗透視婚紗蹺住英皇老闆楊受成入場，薛凱琪興奮大叫「阿嬌好靚」，沿途同賓客揮手；之後楊生將阿嬌交給Michael，兩人十指緊扣行上台，Michael還細心地幫老婆整理婚紗，十分體貼。另外，鄭紹康都有擺片，見到Michael同阿嬌已經上咗台講愛的宣言。而洪卓立同吳浩康，於10點前離開，兩人表示有工作要先走。
講到阿嬌同老公Michael嘅浪漫水底照，係佢哋早前去墨西哥影嘅，之前阿嬌接受訪問，曾講笑話外國化妝師將佢化成好似一個泰國人一樣，而老公塊臉就好白，令佢覺得好奇怪。
不過，呢輯婚照今晚正式喺婚宴曝光，相片效果不俗，而且相當浪漫，但其實拍攝時有好多驚險位，故最後未完成拍攝就腰斬。阿嬌早前受訪時透露，拍攝地點係當地聞名嘅天然地谷，佢哋喺鐘乳洞內嘅海底拍攝，但佢因為唔熟水性，未落水已經好驚，但拍攝時係冇用氧氣筒，佢哋要潛到深水位置影，全程有人不斷幫手推佢哋落水。
阿嬌話當佢意識到就快要上水吸氣時，突然發覺條裙纏住佢對腳，佢完全踩唔到水，好彩身邊有工作人員將佢推上水面。由於當時水好冷，佢哋來回上水又落水影咗差唔多四個鐘，Ｍichael首先提出想走，於是佢就一齊走，本來仲有兩個景點要影，但最後都係捱唔住，決定腰斬。
精選娛聞，喺晒《娛果》
http://fb.com/appledailyent
|
鍾意就快D Share啦！
|
|
|
