李嘉係個點嘅人？留意佢武者身份嘅，或者會覺得佢係個粗獷硬漢；留意佢演過嘅角色，或者會覺得佢猥瑣賤格。不過，大帥哥張衛健就話佢雖然外型大大嚿，但其實係個可愛嘅人。
「比較有趣嘅係，據我所知阿嘉係我fans嚟嘅。其實我都驗證咗好多次，好多時大家一班人對緊稿，或者我排緊戲嘅時候呢，一個眼神掃射時突然同佢有眼神接觸，成日都見到佢痴痴迷迷咁望住我，微微嘴笑咁望住我。我話：『做咩呀？』佢話：『無嘢呀大哥，無嘢。』咁我都覺得好可愛囉，有個大大嚿嘅男人好鍾意Dicky，嗰種窩心法呢又好得意，唔同其他fans話好鍾意你嘅感覺，我唔識形容。」張衛健說。
聽完Dicky咁講，李嘉似乎同劇中傻更更嘅冬來有幾分似喎，因為似所以先演得好？唔完全係，都要靠努力嘅，連大帥哥都讚佢係個「好腳踏實地、實幹型演員，值得大家留意」。「佢今次戲裡面唔算太多對白，但就算得一句對白或者一粒字，好、去、喊、信、撐咁樣都好啦，佢都係好有心機去演好嗰粒字。係值得俾多啲機會嘅一位演員。」
所以話無論做咩都好，態度最緊要！「天氣無論幾熱都好，喺到等嘅時候，佢汗流浹背、成面成頭流晒汗，佢都著住套軍裝喺度等埋位，而唔會話導演嗌埋位喇，佢先至慢慢著返件衫咁樣，唔會囉。」誠如大帥哥所講，李嘉「係一個值得俾多啲機會嘅演員」。
立即下載Apps，隨時隨地睇盡時政專題、深度偵查、娛樂熱話！
按此連結：http://bit.ly/next28app
來源 source: http://nextplus.nextmedia.com
|
鍾意就快D Share啦！
|
|
|
