中國星老闆向華強噚日70大壽，喺灣仔一間酒店舉行生日派對，圈中近百好友均有到場賀壽，包括劉嘉玲、劉德華、邱淑貞同二女沈日、李連杰、鄭秀文、張家輝、劉青雲夫婦、關之琳、古天樂、陳小春一家三口、黃浩然、徐小鳳、鍾鎮濤、于冬夫婦、朱李月華、周焯華、杜琪峯、韋家輝、何超瓊、許冠文、林建岳、劉偉強夫婦、洪金寶、曾志偉、任達華夫婦、張智霖夫婦、楊千嬅與老公丁子高、呂良偉夫婦、鄺美雲、徐克、施南生、蘇永康、邱禮濤、羅守耀、黃柏高等，真係星光熠熠。更難得係華仔完咗紅館騷之後，即刻趕去現場賀向生，同向生、向太一齊切壽桃，跟住上台獻唱一曲送畀向生，劉嘉玲就走到台邊獻花，兩人仲面碰面親一下，玩得好開心。
向華強講到生日願望：「我當O依家係50歲，好健康地活多20歲，呢個係最低嘅要求。」向太好甜蜜咁話：「我90，你99，大家一齊走！」問到向太送咩禮物畀向生﹖向太指呢個派對係佢搞，向生即刻話：「梗係感動」問到向太對向生有咩愛的宣言，佢話：「我哋已經38年，我諗住同佢有個60年。」係咪再搞個大Party﹖向生點點頭。向太繼續笑住話：「可能到時行路唔方便，咁希望40年再搞一次大Party，等到佢90歲，我哋可以行得、食得、玩得。」問到向佐對爸爸有咩表示﹖佢話：「有啲心意，準備唱一首梵文歌，同埋黑澤明畫嘅畫，梵文係最大嘅祝福。」講到向生最為人印象深刻，莫過於電影《賭神》內「龍五」一角，問向生會唔會特意開拍一套《龍五傳》﹖向生笑住表示：「唔好再搞呢啲嘢。(可以搵向佐接班﹖)等佢做第二啲角色」向佐表示：「等佢做一個傳奇。」大家都想再睇「龍五」喎﹖向生笑謂：「咁翻睇《賭神》」
講到派對之上粒粒巨星，曾志偉話：「一定勁過台慶啦，好開心，今日大家一齊聚下，上一次聚會係成龍攞奧斯卡，當時大家講過不如一年聚一次。」同向生會唔會傾下電影上嘅合作﹖曾志偉話：「佢搞親都好大陣仗，佢對電影圈好大貢獻。」問到曾志偉會唔會不醉無歸﹖佢笑住話：「會，我交低咗電話喇，仲叫咗酒店準備一張靚嘅輪椅枱我出去。」
鄭秀文表示主人家示意唔好送禮：「人到，向生已經好開心，祝佢70歲有心有力，開拍多啲電影，其實向生完全唔似70歲。」在旁嘅張家輝指向生閒時會做氣功，鄭秀文話：「咁好成功喎，最重要係健康，生活快樂已經足夠。」張家輝透露佢都有做善事作賀禮，鄭秀文指：「O依家興咁樣，好似華仔開演唱會，都好少送花，做善事會有意義，我嚟緊都開演唱會，我都叫朋友唔好送花，我寧願吹多啲汽球整熱氣氛。」會唔會叫向生開多啲戲﹖鄭秀文笑住話：「《向生傳》！」不如叫向生開《龍五傳》﹖鄭秀文開玩笑咁話：「都好喎，不過向生唔好做主角，我擔心票房，搵向佐做，張家輝做賭神，我做賭神老婆。」
此外，陳小春除咗同太太應采兒一齊現身外，仲帶埋囝囝Jasper嚟添，小春話：「佢出世之後都未見過向生向太，所以帶埋佢嚟賀壽。」對於有傳應采兒有咗﹖陳小春未有否認，只係話：「再傾(係咪要留意佢個肚嘅變化﹖)再傾丫！」
精選娛聞，喺晒《娛果》
http://fb.com/appledailyent
| (左圖：互聯網圖片、右圖攝影：陳俊強) | | |
| | | |
| | | |
| | | |
| | | |
| | | |
| | | |
| |
|
鍾意就快D Share啦！
|
|
|
