陳煒近年密密為無綫拍劇，反應雖好但總與獎項擦身而過，今年她終憑《宮心計2深宮計》成為視后大熱之一。大後日台慶頒獎禮，煒哥更把握最後的拉票機會，日前「落區」走入旺角街市，爭取街坊及商販支持。至於未嘗視帝滋味的張衞健，昨日出席活動時，表明不介意為爭視帝而繼續開新劇。陳煒及張衞健為求開齋，果然可以去得好盡！
相關新聞：陳瀅撐陳家樂拎男配
由亞視過檔無綫的「煒哥」陳煒，加盟無綫六年密密拍劇，她今年在《宮心計2深宮計》飾演個性毒辣的太平公主，與黃智雯及李佳芯同是無綫台慶頒獎禮「視后」大熱。選視后公眾有份投票，換言之人氣越高越有着數，無綫台慶頒獎禮將於大後日舉行，日前《蘋果》拍到煒哥把握最後拉票機會，主動走入旺角街市造勢。
煒哥日前在中環出席活動後，就馬上回家換衫，約下午5時，煒哥再由助手揸車到旺角買餸。這位候選視后手持環保袋走入街市，不少街坊都認得煒哥，跟她打招呼兼要求影合照，煒哥亦有求必應。跟街坊打招呼後，煒哥走入一間豆品廠嘆豆腐花，之後再到魚檔揀海鮮。
| 到海鮮檔時，陳煒被幾個大男人包圍也毫不怯場，更獲店主送蜆、海螺等。 | 陳煒到街市後，先到豆品廠食豆腐花祭五臟廟。 |
買龍蝦再送蜆
煒哥似乎是這個街市的常客，沿途不少檔主都認得她，尤其她在魚檔時特別受歡迎，有四、五個男人圍住煒哥，不停讚她漂亮，又說支持她攞視后，𠱁得煒哥笑不停。煒哥在海鮮檔購買龍蝦及貴妃蚌，檔主再額外送蜆，就連隔籬檔老闆也免費送蝴蝶蚌及海螺給煒哥。煒哥最初都不好意思接受，她推搪幾次之後，因為盛情難卻終於都收下，滿載而歸。之後煒哥再去買菜、醬油及臘味等，約一小時後，煒哥就返回七人車，由助手接載返家。
煒哥事後接受傳媒訪問，她說：「我通常都會買定啲餸返屋企慢慢煮，咁啱嗰日有朋友嚟食飯，就買咗少少海鮮，佢哋送咗好多嘢畀我，真係好多謝。」有眾多街坊支持，有信心爭視后嗎？煒哥說：「每次去到多人嘅地方，遇到有人話鍾意睇我，話支持我攞視后，聽到呢啲說話係好鼓舞嘅，拍戲咁辛苦，真係好需要聽到呢啲支持嘅聲音。」事業得意之餘，煒哥自12年與台灣前夫顏志行離婚後鮮有緋聞，她對愛情仍有期待嗎？她坦言：「當然想多個伴，有人分憂，但暫時未有呢個緣份。」
相關新聞：【獎落誰家】視后惡鬥 三黨爭獎
「拍到畀我為止」
另外，憑《大帥哥》角逐視帝的張衞健昨日到將軍澳出席拍檔楊秀惠投資的美容店開幕禮，他亦不忘為《大帥哥》拉票，更大爆母親把楊秀惠認錯做恬妞。 他說：「噚晚我車住阿媽，佢話同你做《大帥哥》嗰個做得好好，話係乜妞，最後叫咗恬妞。」張衞健未嘗視帝滋味，他不諱言有意爭視帝：「最緊要觀眾鍾意，獎項方面，我下年再拍，後年再畀囉，唔畀咪一年拍一部，拍到畀我為止。」
至於獲女配角提名的楊秀惠，近日在《大帥哥》連場喊戲逼真又感人，楊秀惠歸功於張衞健：「場戲出咗街收到好多意見，好多謝張衞健，其中一場戲份，係佢專登全部幫我度過，好人性化，拍時都喊到收唔到聲。」
採訪、攝影：徐錦池、孔志豪、嵐山、卓寶花
|
鍾意就快D Share啦！
|
|
|
