熱爆娛樂: 【爆相爆片】搭車爭凳仔好躁肥哥哥大戰阿叔 _

2018年12月13日星期四

搭巴士雖然唔講得上係同坐一條船，但既然同車，點解唔可以忍讓吓呢？好似周三晚9點幾咁，兩個男乘客懷疑因為爭位坐問題，喺大欖轉車站轉車時，就喺部269C線九巴上大打出手。結果驚動警員到場，仲將兩人都拉晒添，其中一個57歲嘅巴士阿叔面部紅腫受傷要送院，有乜謂呢！

市民莊先生當時就係現場目擊經過，據佢所知涉事嘅巴士阿叔，同另一名着灰色衫、身形肥胖嘅男乘客，喺轉車之前搭另一部69X九巴時，已經發生爭執。當兩人落車轉搭269C巴士時，巴士阿叔就從後追上嚟，喝住對方叫對方唔准走，唔畀阿肥哥仔上部269C巴士。

當時肥哥仔身邊仲有一個女友人，佢都勸肥哥仔算啦唔好嘈，兩人於是上車，點知巴士阿叔就跟住上車，雙方你一言我一語又爆衝突，仲打起上嚟添。莊先生話當時見到有人起腳踢向肥哥仔，之後有人就㩒住巴士阿叔喺車上係咁砌。

現場有女乘客見巴士阿叔似乎無還手之力，一度上前勸對方唔好再打，話：「佢死咗你大件事呀！」但有人就好激動咁大聲話：「佢打我呀，佢搵支筆插我呀，大家見到」事後車長停車並報警，莊先生話雙方打咗十幾秒，樓上有個着黑色衫嘅休班警由上層落嚟，將兩人分開之後帶晒落車。

其間巴士阿叔一度向休班警展示臉部傷勢，說：「我被佢打到咁，佢喺69X已經打我！」惟肥哥仔反駁說：「咁你頭先夠用支筆插我」其身旁女友人亦幫口話巴士阿叔：「你以為七老八十大晒呀！」之後警員接報趕至處理。

警方話事件中，兩個男乘客本身喺巴士一齊坐，但懷疑因爭位坐問題，有人指對方太大份發生衝突。警員拉咗涉嫌打交嘅57歲姓吳同38歲姓陳男乘客，吳報稱面部受傷送博愛醫院治理，而陳亦話胸口痛，但就唔駛送院。

你敢爆，我敢獎！立即WhatsApp《蘋果》24小時爆相爆片熱線或致電：63836568

		 肥哥哥㩒住阿叔係咁打。(讀者莊先生提供)
 事後阿叔執起糾纏間跌落地嘅電話同眼鏡。(讀者莊先生提供)	 有位坐上層嘅休班警員落嚟調停。(讀者莊先生提供)	 着黑色衫嘅休班警員再將兩人帶落車報警處理。(讀者莊先生提供)