何韻詩喺科學園搞嘅《On The Pulse Of 我們正在》音樂節，呢個音樂節開到今個月26號，原本聽日就會有閃靈樂隊表演，不過阿詩今日就喺facebook指，閃靈樂隊聽日嘅演出將會取消，而原因係入境處一直都未批閃靈樂隊嘅工作簽證。
阿詩喺facebook指：「自11月12號遞交申請，至今已個多月，入境處一直沒有給予我們任何正式回覆，只是期間一次（12月3號）要求補上各成員之戶籍謄本；之後每次追問，職員都只表示『等待上司回覆中』。以我們過往為演唱會其他非港人外籍人士，申請工作證只需一個星期便獲批的經驗和速度來看，這次的處理時間及效率上明顯有別。」阿詩更嬲爆喺facebook回應：「其實都預咗Freddy有機會唔批，並且已有plan B，但完全唔覆、拖字訣真係X街到無人有。呢次只係純音樂交流，驚啲咩呢？」
閃靈樂隊嘅簽證點解會有問題？呢點就真係入境處先知，不過可能同閃靈樂隊主唱林昶佐(Freddy)本身嘅理念有關，Freddy一向都有留意國際人權、台灣獨立等公共議題，仲會參加唔少社運，亦公開支持台獨，而佢哋更喺訪問中講過自己係「台獨樂團」，仲話自己唔只係台灣之子，更加係台獨之子。
何韻詩接受《蘋果》訪問嘅時候就話：「呢件事件好荒謬，因為呢個只係一個純藝術嘅音樂節，冇任何政治色彩成份，點解一個純藝術嘅一件事，會因為樂團其中一個人嘅政治立場，而成個團都唔批呢？我哋都有一個心理準備，呢件事係唔會批，我哋入咗紙之後，就好似入咗黑洞咁，踏入十二月我哋每日打過電話畀佢哋，佢哋都只係話要等上司回覆，真係好難接受。」
阿詩又話要取消呢個演出，真係對觀眾好抱歉，佢仲話：「周國賢今日見到有單位要取消之後，佢就話聽日會唱多一個set，真係好多謝佢幫手。」
台灣《蘋果》問到閃靈團長Doris今次嘅事件，佢表示：「11月初左右開始申請工作證，我們從2014年去香港Clockenflap後，團員各自有不同規劃，像是結婚、懷孕生小孩、選立委啦，所以有一陣子沒去香港了，我們也是第一次碰到這種狀況，以前工作證1、2個禮拜就下來了，這次比較久，想說等看看，昨天才得知真的取消。」Doris表示近年唔少香港嘅朋友都話「香港變了」，佢感慨：「我們也有感覺到，2000年時開始常去香港表演，現在在台灣也看得出來香港政治發展及轉變。」Doris又指多年前曾去香港表演，今次係第一次碰到呢種狀況，更加深刻感覺到香港嘅改變：「覺得很遺憾，還是希望未來有一天能去香港表演，也希望香港樂迷不要放棄希望，要為自己喜愛的土地、事情打拼努力。」
精選娛聞，喺晒《娛果》
http://fb.com/appledailyent
| 聽日閃靈樂隊嘅時間會由周國賢頂替 | | |
| | | |
|
鍾意就快D Share啦！
|
|
|