33歲人妻楊愛瑾（Miki）前年嫁咗畀富二代郭永淳，升呢做永安新抱，囝囝Luken舊年出世，眨吓眼都已經1歲半大，Miki喺10尾宣佈再陀第二胎，三年抱兩，真係值得恭喜。
Miki專心養胎做闊太，平時唔使湊仔，都係行街shopping居多，日前佢身穿西裝褸襯爛牛，腳踏平底鞋，喺中環ifc出現，見佢面圓圓同身形都肥咗少少。佢一個人首先行咗入去一間專賣有機護膚品嘅商舖，估計佢之前已經訂好心水貨物，所以佢入店後，店員已好快將一袋戰利品交畀Miki，Miki同店員傾咗一輪先捨得走。之後，Miki行咗入商場嘅高級超市，見佢全程慢行，專攻健康類食物，如蔬菜、水果、三文魚等食材，原本打算去排隊畀錢時，佢再攞多兩袋麵包，果然要照顧家中大小同肚裏BB，所以要食得健康。
最後，Miki就拎住一大袋戰利品離開，佢行去扶手電梯時，記者上前問佢腹中BB係男定女，佢就有禮貌講：「唔好意思。」避做訪問，行到去商場門口，原來已有朋友做柴可夫，揸住車嚟準備接送。Miki雖然大肚，不過嚟緊會外出旅遊，佢之前就在喺Ig貼文，講到要帶囝囝坐飛機，加上自己陀住一個，顯得擔心，佢留言表示：「真的好忙好忙……月中要帶著Luken坐長途飛機，諗到都緊張。雖然佢已經一歲半，但我肚裏還有位寶寶，始終在照顧上也不太方便，希望Luken在飛機上能睡上8小時，盡量不打擾到其他旅客，時差方面也能調節得好，還有行李清單也要準備好。」
精選娛聞，喺晒《娛果》
http://fb.com/appledailyent
|
鍾意就快D Share啦！
|
|
|
