彭皓鋒喺無綫拍劇超過16年，一直都係綠葉做陪襯，而且多數演壞人。2012年因為拍劇機會大減，決定離開大台轉戰大陸。2016年，終於憑網絡電影《老師上錯身》入圍《美國荷里活國際電影節》，並成功奪得「最佳男配角」。2017年，又憑《破冰》奪得《加拿大金楓葉國際電影節》網絡電影組別「最佳男主角」。
彭皓鋒闖出名堂，但佢無怨TVB以前埋沒人才，反而話：「我嘅演技喺TVB磨練出嚟，無佢我無今日。」做慣惡人嘅佢，原來飲水思源。
對TVB都有情有義，對三個仔女當然唔使講，所以彭皓鋒一度覺得對仔女有遺憾，因為工作關係失去咗同小朋友相處時間，並衍生問題：大仔見到爸爸喺電視入面打人，覺得佢係壞人，唔明白咩係做戲，經常唔開心；二女成日無爸爸陪喺身邊，試過同老師講自己無爸爸；孻女習慣瞓前要見到爸爸，但彭皓鋒只能以視像陪伴，有次信號唔好斷咗線，孻女扭晒計。彭皓鋒心入面明白小朋友需要爸爸陪伴，但搵食，無計。
其實除咗三個小朋友，老婆一個人湊仔女又何嘗唔辛苦？所以彭皓鋒難得有時間都唔會忽略老婆，趁啲仔女平日返晒學，即刻呼朋叫友帶埋老婆一齊聚會開心吓。散場之後，兩公婆又會十指緊扣糖黐豆，見到商場佈置更加會自拍留念。
一個男人，對外賺錢養妻活兒，對內識得感激、內疚並盡力陪伴補償。彭皓鋒，好男人。
來源 source: http://nextplus.nextmedia.com
|
鍾意就快D Share啦！
|
|
|
