沒有6呎高嘅黄曉明，不時被網民質疑着增高鞋變高啲，日前佢跟楊冪、劉燁、陳坤等出席2018微博之夜典禮，西裝骨骨嘅黃曉明着咗黑色皮鞋，有眼利嘅網民發現左腳鞋面明顯高咗，質疑佢出蠱惑增高。
今日黃曉明喺微博晒赤腳相，自揭「增高」血淚史：「左腳是我的獨家限量高腳背，天生高腳背，出過事故後導致組織增生，腳麵（面）高上加高，穿很多鞋都很痛苦。」黃曉明更抵死問網民：「就想問問天生高腳背的朋友們：那種鞋面很高，穿起來不會擠腳的鞋哪裏能買到？」
從相片中見到，黃曉明嘅左腳腳面凸起咗一嚿，又高又腫，好似一隻雞蛋咁。事緣14年黃曉明拍攝電影《白髮魔女之明月天國》時，疑因天氣突發大風，令吊臂發生偏離，威吔滑軌，黃曉明由3米高摔下，左腳兩隻腳趾粉碎性骨折，手術後腳部植入4粒鋼釘、2條鋼針，黃曉明仲自嘲係「鋼釘俠」，醫生要佢休息3個月才能恢復站立，但當時黃曉明僅停工1個月，就坐高鐵到上海出席電影《大上海》宣傳，由周潤發推着輪椅現身。
當時發哥仲用扇子幫黃曉明撥涼，發哥更笑言要幫坐咗6粒鐘高鐵嘅黃曉明按摩屁股，又喺對方嘅石膏腳上簽名留念，黃曉明談到傷勢表示：「30天之後才能拔針，100天後才能拔釘。」原來佢隻腳痊癒後，出現組織增生後遺症，網民都心痛留言：「這年頭敬業負傷也要被造謠」！
精選娛聞，喺晒《娛果》
http://fb.com/appledailyent
|
鍾意就快D Share啦！
|
|
|