現年51歲嘅大台前藝人黃澤鋒，2010年娶圈外女友陳麗麗(相關連結： https://bit.ly/2SX8Wq7 )，兩公婆結婚8年多，噚晚佢哋喺facebook開心share，貼出一對初生嬰兒手套，留言：「1+1=3，2019願望成真，以欣喜之心迎接新生命的來臨，一家三口。」
今日《蘋果》打畀「準豬爸」黃澤鋒，佢開心咁話：「係呀，係呀，真係多謝你，咁嘅年紀做爸爸，其實我哋結咗婚將近十年，無論仔或女都想有，都好開心，我哋都唔細，有一個家庭就完整啲、開心啲，我有教小朋友（游水），佢哋有曳有乖一面，我哋都鍾意小朋友，今次有真係好開心。」
黃澤鋒又話太太目前有咗剛剛三個月，雖然黃澤鋒喺fb貼出粉紅手套嘅相，不過佢話唔係暗示生女，個肚仲細，仲未照到BB性別：「預產期7月，之前要預備啲嘢喇，我未做過爸爸，同新手冇分別。」
黃太陳麗麗52歲係高齡產婦，問到黃澤鋒點樣照顧太太？佢話：「太太所有重嘢唔拎得，我見佢都辛苦，陀住BB見佢冇乜氣力，最重嘅嘢喺晒我身上，出入都車佢，聽講呢段時間最麻煩，醫生話過咗呢段時間好啲，小朋友、大朋友都關我事，我呢排好忙，另一方面要搵奶粉錢，又勤力做嘢，所以有job都接，如果大家聽到我呼籲，畀多啲job我，搵多啲錢養小朋友嘛，太太教緊泰拳班我接手，雖辛苦，但辛苦得嚟好開心，迎接一個新生命，對於我嚟講應該唔同咗。」
精選娛聞，喺晒《娛果》
http://fb.com/appledailyent
|
鍾意就快D Share啦！
|
|
|
