今晚《2018年度勁歌金曲頒獎典禮》尾聲，分別頒發主要獎項，好似「最佳演繹男、女歌星」分別係吳若希同胡鴻鈞奪得，至於「最受歡迎網絡歌星」就係菊梓喬（Hana），而「人氣王大獎」就由周柏豪奪得。
之前傳過Hana同吳若希不和，今晚吳若希拎金曲獎前，佢由座位企起身，隔住Hana同胡鴻鈞擁抱祝賀，令不和之說再升上枱面。到頒發壓軸大獎「最受歡迎女歌星獎」宣佈係菊梓喬時，坐在旁嘅吳若希好開心拍爛手掌好興奮，仲同Hana大方擁抱，今次菊梓喬真係「一姐」喇！佢上台「多謝TVB，由我第一首劇集歌開始，有留意我呢個人，跟住一首接一首全部都好好聽，令到你哋認識我，多謝公司對我嘅鼓勵。我冇諗過，我真係冇諗過（得獎），最近好多朋友問我，我都係平常心，因為做到歌手、唱到歌已經係我畢生嘅夢想，好多嘢嚟得太幸福，多謝各位。」
至於「最受歡迎男歌星」就係第四度獲此獎嘅張敬軒，重提自己當年係TVB清水灣長大，主持音樂節目，所以佢更加要多謝台前幕後嘅工作人員。張敬軒憑自己監製嘅《百年樹木》，獲得「勁歌金曲金獎」。軒仔得獎後表示：「好開心，呢一首歌得到咁大嘅肯定，好多謝每一位仲有購買實體唱片嘅朋友，對我哋嚟講係肯定，對音樂嘅尊重。」而軒仔後來亦有感謝買數碼歌曲嘅歌迷。
精選娛聞，喺晒《娛果》
http://fb.com/appledailyent
|
鍾意就快D Share啦！
|
|
|