譚凱琪、陳凱琳、龔嘉欣等少婦聯盟今晚同埋韓星崔宇植，去到馬鞍山出席倒數活動。
譚凱琪以好性感嘅金色裙騷腿同騷deep V事業線，佢話係為咗慶祝新一年新開始，而且今晚好開心同好姊妹一齊搵真銀。佢又話龔嘉欣可能係少婦聯盟第二個跑出，而自己就未有任何計劃，以事業為重，但同男友都會朝結婚呢個目標進發。
陳凱琳有咗BB，譚凱琪話反而令自己想放慢腳步，因為朋友之中已經有人有咗BB，第時出咗世叫聲姐姐就OK。而今年年尾好幸運，因為《大帥哥》反應收，吸引咗好多小朋友fans，好多5~10歲嘅小朋友whatsapp佢，去街市買餸平兩蚊。雖然盛裝打扮，但唱《終生美麗》時就甩晒beat。
陳凱琳同龔嘉欣受訪時話，少婦聯盟重聚好開心，最近兩個星期見一次，陳凱琳又多謝龔嘉欣好似妹仔咁照顧佢，會叫人小心啲唔好踩到佢條裙，又會拖住佢走圍行。
問到龔嘉欣有冇打算做契媽？佢話：「呢個要問BB先得，最緊要佢健健康康。得佢（陳凱琳）一個結咗婚，成日問佢有咩感受，陀BB有咩感覺。」譚凱琪受訪時話龔嘉欣會係少婦聯盟第二個結婚，龔嘉欣就say no：「哎呀，我讓咗佢先。」
講到新年願望，龔嘉欣話想留長番頭髮，加上今年冇劇出街，好期待下年係豐富嘅一年。至於有報道指佢同男仔食high tea，龔嘉欣就答：「我會同啲閨密講悄悄話，等我結婚就會好認真咁同大家分享。」
陳凱琳就話新年願望係做個好好媽媽，希望每日都有嘢可以感恩。今日佢着住3、4吋高踭鞋出活動，佢就話係自己貪靚，不過都係落車先換上，咁老公有冇批准架？陳凱琳話：「佢都知我穩定咗，同埋佢見我着過都冇問題都放心。」
大家都好開心BB嘢準備成點？陳凱琳話：「好用心咁上網睇咗，需要嘅嘢都睇緊，BB房冇特別裝修，買咗啲嘢返嚟已經有個種味道，同埋驚油油之後，我聞咗陣味唔係咁好。」龔嘉欣自動申請做陪月，佢話好鍾意小朋友，希望係兩個小朋友，講到佢有個high tea男，佢就話：「high tea要進化做dinner先得。」
韓星崔宇植用廣東話講：「大家好，我係崔宇植。」之後佢試食地道美食，好似雞蛋仔，菠籮包等。
精選娛聞，喺晒《娛果》
http://fb.com/appledailyent
|
鍾意就快D Share啦！
|
|
|
