掃呢頁CODE去手機

2019年1月1日 星期二

【入行20周年】星座小王子前身唱片公司要員 曾帶歌神張學友訪問 __,張學友,

攝錄:沈健程、廖達燊
90年代睇星座運程,大家都要問「星座小王子」。「星座小王子」王安迪嘅Icon係黑超cap帽小子,至今生招牌不變,今年係星座小王子入行20周年。年輕一輩 ...


90年代睇星座運程,大家都要問「星座小王子」。



「星座小王子」王安迪嘅Icon係黑超cap帽小子,至今生招牌不變,今年係星座小王子入行20周年。年輕一輩0依家睇星座運程,隨時上網撳掣就會搜尋到好多資料,但20年前資訊冇咁發達,唔少人對星座小王子還是有情意結。



星座小王子前身係寶麗金唱片公司宣傳人員,當年帶着新入行嘅張學友出去接受媒體訪問,星座小王子日前喺灣仔接受《蘋果》專訪時話當年,「當年帶住學友,都係我第一份工,我同佢都係初出茅蘆小子,大家好多嘢啱傾,佢係典型巨蟹座好男人,學友好重情義,0依家撞見機會唔多,但撞見都好親切。」當年唱片幕後人會轉來轉去,星座小王子也過檔華星唱片做高層,佢幫過嘅歌手有鄭秀文(Sammi)、林憶蓮、孫耀威等多不勝數。



星座文化90年啱啱由外國傳來香港,當時冇網絡,搵相關資料唔容易,星座小王子話:「始終我哋做娛樂圈,攞資訊係快啲,我哋同藝人走埠,去美國、歐洲登台,可以搵到相關資料返嚟,再慢慢研究。」



講到星座小王子個名都有古仔,「個名唔係我自己改,呢個名出現幾神奇,97年嘅大除夕,我去一個朋友生日,去完仲有倒數party,同場好朋友陳海琪偏偏要返去電台做《海琪的天空》,佢要我陪佢返去開咪,臨開咪前,海琪話聽日元旦,叫我都同聽眾分享來下新一年星座運程,海琪開咪就講『今日特別嘉賓係星座小王子』,咁啱嗰晚節目反應好好,於是我就多咗星座小王子嘅身份。」星座小王子自97年出現後,佢就經常出現電台、媒體同專欄,同大家分享星座運程,其後機緣巧合,星座小王子喺08年北京奧運時仲返咗內地發展,佢索性北上開拓巿場,索性將工作基地轉移到北京,今年係星座小王子喺星座學上發展嘅20周年。



學星座,其實唔難,除咗學好基本星盤,星座小王子覺得同人生閱歷都有密切關係,「如果人哋要問你感情問題,你根本冇拍過拖,或者未結過婚,解答唔到嗰啲人生問題,星座可以隨住人生經驗多咗睇得通透,我仲可以同你分享未來,幫助解決問題,我分析星座,唔想將負能量傳出去,咁唔係研究星座命理好嘅方向。0依家資訊發達,星座學多咗好多嘢,」星座同生肖都係依據一個人出生日期嚟計算,星座小王子話:「冇話邊個準啲,都係根據出生時間同資料,所以計算出嚟人生大方向都會係一樣。只係中國文化同西方文化上有唔同,中國人好命係睇你有冇錢,係咪做官有權,屋企關係點,子女係咪孝順,但西方人嘅lucky會着重心靈上,佢哋認為有錢但唔開心,都唔代表係好運,所以星座着重心理,幫助人生活得更開心,就算冇錢、冇拖拍,但日日好happy都代表好運。星座生肖推斷搬屋生病,五行大方向差唔多。」



星座小王子自己係雙魚座,性格浪漫,追求愛情,不過佢卻用六個字評雙魚座男生:「愛情世界裏,佢哋唔識拒絕,渣男中嘅渣男。」星座小王子雖篤信星座,但唔會每件事都要算一算:「我心態相信命運,順其自然,好多嘢係整定,知道人生大方向就好,千祈唔好迷信,最重要係迷而不信,我唔會為自己推算。記得我年青輕時算過命,當年大師叫我唔使問咁多,佢話我會有名有利,有車有樓,以當時香港人標準,呢啲好基本。大師最後講咗四個字,佢話我會蜚聲國際,真係除咗香港,整個亞洲我都有巿場,0依家互聯網年代,我已將星座小王子變成IP化。」講星座係咪好搵錢,星座小王子話:「錢只係數字概念,我覺得買乜使得起,想食食得起先係有錢,否則有幾十億,只食鹹魚白菜。」



採訪:比華利

場地提供:Santé Wine Bar





精選娛聞,喺晒《娛果》

http://fb.com/appledailyent



攝錄:沈健程、廖達燊 星座小王子話學星座要先學星盤,但易學難精。 星座小王子話學星座要先學星盤,但易學難精。
星座小王子入行20周年。

星座小王子入行20周年。
星座小王子話要順其自然,好多嘢係整定。

星座小王子話要順其自然,好多嘢係整定。
星座小王子以前曾做過唱片公司高層。

星座小王子以前曾做過唱片公司高層。
星座小王子勸喻大家千祈唔好迷信,最重要係迷而不信。

星座小王子勸喻大家千祈唔好迷信,最重要係迷而不信。

鍾意就快D Share啦!