掃呢頁CODE去手機

2019年1月3日 星期四

英超Fever:蘇B領曼聯四連勝 贏福仔「超西曲墜」! __,曼聯,

(法新社)蘇斯克查上任後,領曼聯於英超聖誕、新年快車四連勝!紅魔鬼於蘇B帶領下重拾魔性,今仗作客紐卡素,幾名中前場主力拉舒福特、盧卡古及保羅普巴都有出 ...


(法新社)


蘇斯克查上任後,領曼聯於英超聖誕、新年快車四連勝!紅魔鬼於蘇B帶領下重拾魔性,今仗作客紐卡素,幾名中前場主力拉舒福特、盧卡古及保羅普巴都有出色表現,其中福仔更大騷其「超西曲墮」罰球絕技,成為贏波第一功臣。福仔分別於上、下半場,射出勁重西嘅飄忽罰球,兩次令對手門將甩手,其中一次造就盧卡古打開紀錄,之後佢自己射入埋齋入球,協助紅魔順利贏波。

於蘇斯克查麾下愈踢愈有信心嘅拉舒福特,上半場9分鐘就有威脅埋門,佢於左路邊線處理罰球勁射近柱,個波勁重回旋,主隊門將杜巴夫卡想接實但甩甩漏漏,僅能撲出底線。紐卡素之後憑基斯甸艾素兩次左路突破埋門,但都過唔到迪基亞。曼聯於新帥帶領下,中前場走動極多,球員配合絲絲入扣,普巴、桑馬達第一時間交波靚絕,可惜安東尼馬迪爾埋門被閂走;普巴之後禁區頂一記遠射亦唔中龍。稍後桑馬達右路罰球斬入禁區,菲爾鍾斯一頂高出,半場兩無紀錄。

64分鐘曼聯終有斬獲,福仔處理25碼左路罰球,佢照辦煮碗落重西,杜巴夫卡仲未吸取教訓想接實,但又再次甩手,被後備入替嘅盧卡古執雞補中,曼聯領先1:0。紐卡素攻力極弱,落後谷極唔起,客軍80分鐘靠反擊入多粒,福仔中路策動分畀右邊盧卡古撥橫,A山妙傳空晒嘅福仔,後者輕易射成2:0完場。

曼聯解僱摩連奴後,蘇B上任順風順水,連贏卡迪夫城、哈特斯菲爾德及般尼茅夫,今仗贏埋紐卡素,令蘇B成為紅魔鬼史上第二位領軍頭四場聯賽全勝嘅新帥,第一位正係殿堂級領隊畢樹比。


來源 source: http://hk.on.cc
鍾意就快D Share啦!