台灣娛樂新聞節目《娛樂百分百》由1997年開播至今，歷經近22年相當長壽。原因，當然係內容趣味性十足啦，好似最近一集就有嘉賓喺節目中跌咗個Nude Bra出嚟，被羅志祥（小豬）發現、執到，仲對住鏡頭展示，堅好笑。
是咁的，節目中有個環節，需要用身體排出中文字俾其他人估。進行期間，主持人小豬同愷樂發現地上有個Nude Bra。個個笑到碌地同時，失主現身，好尷尬咁揞住自己心口，坐喺地上傻笑：「怎麼這麼丟臉！」呢位好瘀嘅失主，就係經常男扮女裝上節目嘅嘻小瓜（謝文傑）。
其實嘻小瓜成日都好自然而然咁做出好多瘀事令觀眾捧腹大笑，譬如佢玩遊戲時，需要利用條頸嘅力量，將頭上假髮揈得越遠越好，最後結果竟然係，佢揈甩咗遊戲用嘅假髮之餘，更揈甩埋自己扮女性用嘅長假髮，不過個長假髮甩啲唔甩啲掛咗喺佢面上，搞到成個長鬚公咁，其他人即笑佢係「一秒變關公」。咁有喜感，難怪網民都讚佢好笑得嚟唔做作，更強烈要求俾佢加入固定主持班底添。
唔知小豬有無感受到壓力或者威脅呢？話晒佢自從2016年宣稱「不用分那麼細，我們都是中國人」後，被不少台灣國民所討厭，就算主持能力強勁，依然風趣搞笑都好，但每逢有佢現身，就會有人重提舊事，甚至揶揄：「不用分那麼細，我們都愛人民幣。」
來源 source: http://nextplus.nextmedia.com
|
鍾意就快D Share啦！
|
|
|
