謝安琪（Kay）與張繼聰是圈中模範夫婦，早年Kay誕下兒子張瞻後，前年更添了一名女兒張靖（Karina），成功湊好字。一家四口更不時出巡享天倫，幸福滿瀉。
兩公婆一直視女兒如小公主般看待，去年舉家往主題公園慶祝一歲生日，而後天便是Karina的兩歲生辰，兩人當然愛女大過天，昨日（20日）更雙雙停工，全天候服侍壽星女。貼地的二人今年選擇了沙田一間平民化的親子主題餐廳，花費約七千多元包了一間30人的派對房，為女兒「大宴親朋」預早慶祝。
波波池內打鞦韆
昨日下午二時許，阿聰化身大力爸單手抱着女兒，與張母及家傭先行到餐廳打點，約十分鐘後Kay才與母親雙雙到場。發現記者的她一臉愕然，更一度掩面不欲上鏡，匆匆步入餐廳會合老公。一家三口之後便往波波池玩耍，紮上小辮仔的Karina穿上粉紅色外套，極為可愛。一臉興奮的她不時四圍跑，並由家傭抱上大波波打鞦韆，Kay與阿聰未幾亦步入池內與囡囡玩埋一份。
「角色扮演」做收銀
愛女心切的阿聰更頻頻拿出手機為囡囡拍照，龍友上身寸步不離，轉頭又與「前世情人」去玩具超市扮濕平。Karina拿着購物籃掃下不少食物，又與附近一名小男孩齊齊玩，Kay亦前來與囡囡「角色扮演」，精靈的Karina扮收銀員為媽咪收錢時，在旁的阿聰見囡囡如此趣致亦忍不住邊拍片邊笑，場面溫馨。
阿聰及後接受東網訪問，對於夫婦停工為囡囡慶生，他說：「係呀，幫囡囡搞個生日會玩吓，係提早慶祝，因為我哋一個好朋友嘅小朋友，同我個女由細玩到大，佢哋差一日出世，所以今日咪一齊搞生日會，仲訂咗個好得意嘅米奇老鼠蛋糕。」至於正日生日，他說：「都會一家人食吓飯。（送乜禮物畀個女？）佢仲細，冇特別買乜畀佢，多啲時間陪佢哋已經係最好嘅禮物。其實都好開心，因為本身要離開香港工作，新戲上又要去內地宣傳，咁啱呢個禮拜阿囡生日仲可以喺香港，我覺得最開心都係同小朋友一齊。」更透露早前因拍戲要練大隻，下星期又要開始減磅：「終於可以收身，要食番好清淡，做番啲帶氧運動，依家體重係我人生當中最重，由140幾磅到依家190幾磅。」
|
鍾意就快D Share啦！
|
|
|
