- 【鋒味曲奇致癌？】差啲俾消委會搞死 謝霆鋒：其實幾唔公平
- 31分鐘前
41
日前謝霆鋒接受訪問分享創業經過、星二代標籤對營商影響，仲有個人品牌嘅發展等話題。霆鋒廿二歲創業，開設後期製作公司，好多人以為佢第一桶金係嚟自後期製作公司，其實係嚟自投資地產，佢喺節目中透露：「我由十九歲開始，所有拍戲嘅賺番嚟嘅錢都係投資地產，因為我唔識其他嘢，我覺得磚頭唔會走。」後來佢將投資地產的利潤開設後期製作公司。一四年霆鋒開始拍攝美食節目《鋒味》；一五年創立自家品牌「鋒味」，當主持講到做名人、星二代，對營商環境係咪利多於弊、又或者產品更易被炒起？點知霆鋒話：「係容易啲死！」佢以自己為例，「好似喺兩個月前，某刊物發放產品報告，測試市面上五十八款曲奇致癌物，雖然『鋒味曲奇』被列入名單內，但報告當中冇詳細列明究竟食幾多先有問題，而我哋嘅曲奇喺咁多測試嘅產品中致癌成份係好低，可能加上我做幕前工作，媒體就會以我嘅品牌作為標題，所以係有啲唔公平。」報告未有反映事實全部，實情係進食份量嘅多寡先係關鍵所在，佢又舉例：「譬如話食維他命會死，但原來係講一日食五十樽，咁梗係會死啦；或者話『食白飯會有糖尿病，因為入面有糖。』唔通唔食白飯？所以要講埋『如果你一日食五百碗白飯，你係會有糖尿病。』如果冇講清楚，其實係誤導緊消費者。」
種種嘅誤解，其實源於模糊嘅機制，「好似坊間睇到『有機』兩個字，通常以為係好嘢，但其實係買貴咗兩、三倍，疑問又嚟，香港對『有機』嘅準則喺邊度？對『食物安全』嘅準則，其實好模糊。我哋每個產品後面都有營養標籤，請好多世界知名嘅實驗室去test，但係擺出嚟賣嘅時候就因為呢個模糊嘅機制而出現問題，其實幾唔公平。」佢苦笑咁話：「最慘係我成為標題，就有人睇。」
問到霆鋒嚟緊美食事業嘅發展，佢就話最希望可以設立到一個統一、清晰嘅食物安全機制，「我真心希望係可以首先改變到機制嘅問題，衷心希望『鋒味』、謝霆鋒可以同香港一齊設立一個機制、一個標準、一個lab，以後經過呢個標準，我哋香港人或者全國人食到嘅食物，根據同一個數據去作出結論，無論同政府又好、大學機構又好或者科學實驗室。有人做唔代表一定會做到；但冇人做，就永遠都唔會發生。」
來源 source: http://nextplus.nextmedia.com
|
鍾意就快D Share啦！
|
|
|
