「宇宙最強」甄子丹日前舉家出席慈善晚宴，點知發生不愉快事件，受到不禮貌對待、種族歧視，最後成家不忿離場！之後傳出好多當日內幕事件，有指子丹嫌冇靚位坐，先至拉隊走人。
事件發生之後，子丹一直都未有發聲，因不想是非沒完沒了，但佢見到好多不實報道，覺得事件被嚴重歪曲，所以決定開腔回應，道出當日的來龍去脈：「其實大會邀請咗我做聯合主席好多年，之前因為時間唔啱做唔到，今年覺得點都要盡力幫手出席活動，做慈善同支持朋友，受邀請時，我同屋企人喺倫敦，我特登自己畀錢改機票返香港，仲去搵物資做拍賣，盡一分力。」
晚宴當日，其實子丹一落車，已經出現混亂，佢話：「我都明白，多人實會咁，我入場時都已經有好多人搵我影相，我見開始混亂，就入咗Ball Room，點知裏面有一班PR團隊，其中一位外籍女仕，佢非常無禮貌咁叫我哋出去。我唔明白點解要咁唔禮貌？但當時都有好多外地藝人喺入面。」子丹續稱當晚現場冇保安、又冇指示，但他都覺得問題不大，一直自己照顧自己，但受到不禮貌對待，就忍無可忍，佢話：「太太見個位外籍女士態度咁差，就要求見團隊負責人，一位外籍男士就過咗嚟，佢用非常唔友善嘅眼神望咗我哋一眼，我太太説話未講完，佢就掉頭走咗，連基本尊重都冇，所以先至決定離開。」
至於有指子丹帶咗20個助手到場兼嫌座位不佳而離場，子丹表示：「簡直荒謬，應該有人為咗推卸責任，而搞咁多歪曲事實嘅嘢出嚟，好多人都知我得一個助手，而當晚我坐乜嘢位根本都冇所謂，我只係想做慈善同支持朋友，我朋友都有打畀我道歉，話嗰個人不嬲都係咁囂張傲慢，我都有搞過活動，好多嘢我都明白，但受到咁不禮貌對待，真係冇可能忍，呢個世界一定有種族歧視，我由細到大喺外國見好多，唔會否定呢樣嘢。」
來源 source: http://hk.on.cc
|
鍾意就快D Share啦！
|
|
|
