「一代大俠」狄龍縱橫影視圈50年，在銀幕上扮演無數英雄角色，73年憑電影《刺馬》紅遍東南亞，現年73歲的狄龍回望半生，慨嘆年輕時因讀書少被看輕，成名後曾被名利沖昏頭腦，為友出頭與洋警官毆鬥，幸獲法官原諒，否則抱憾終身，狄龍嘆說：「人生滋味好似一張抹枱布！」
撰文：余燕儀
攝影：仇志德
相關新聞：結婚44年曾出軌
狄龍出身邵氏武打影星，現年73歲的他仍身體壯健，說話鏗鏘，日前在土瓜灣接受《蘋果》專訪，細訴大半生的經歷。狄龍雖然讀到初中輟學，但字字珠璣：「我細個鍾意睇戲，睇關德興、石堅、于素秋，好迷嘅，夜晚我去健身，練得幾硬朗，睇到邵氏招考新演員，咁我就膽大大，我諗𠵱家年紀如果唔試，邊有機會再試，咁我託朋友寫封信，因為我啲字寫得唔係咁好，託朋友寫得端莊啲，投寄咗照片。」
《英雄本色》封帝
面試當日除了要考打拳，還要考普通話，狄龍說：「我啲普通話梗係笑死人啦，咁張徹導演取錄咗我，當時何冠昌先生同我講：『睇你嘅外表，我哋公司會培養你，呢個係你終身職業。』嘩，呢句說話突然間喺個腦轟一下開竅，但當年收入好微薄，得500元一個月，簽八年，記得我首先同老母講：『媽，我𠵱家搵到份嘢做，但我呢幾年都唔會畀到錢你。』阿媽就話你去做啦，但我同老闆請辭時，佢願意加我人工，我同老闆講，我去行船，呃佢！」
相關新聞：【珊珊舅父】演藝家族百足咁多爪
狄龍在邵氏讀完訓練班後，展開了至今50年的演藝生涯，憑《刺馬》、《天涯明月刀》等電影紅遍東南亞，86年憑《英雄本色》封台灣金馬影帝再創高峯，回望過去的風光日子，狄龍坦言當年有段時間迷失了自己：「好慶幸一帆風順，亦都有迷失時間，勝利有時沖昏頭腦，『當時年少春衫薄，騎馬倚斜橋，滿樓紅袖招（《菩薩蠻》 韋莊）』，嗰種驕傲感同成就感沖昏頭腦，結果闖禍，喺夜店同啲洋人警官發生毆鬥。」
「飲酒戒之在鬥」
狄龍搖頭續說：「一件醜事，雖然係冇打敗，但都犯咗官非，亦都多謝張徹導演同邵逸夫先生出手營救我，當時情形係洋人警官飲醉酒，同我嘅朋友毆鬥，我嘅朋友唔夠打，結果負傷，咁我識聽佢講嗰啲英文，都係唔好講啦，醜事，唔應該咁嘅，後來法官都原諒咗我，咁畀我一條生路，如果唔係，呢個成為我終身嘅污點！所以我𠵱家勸個仔，你血氣方剛時候，對飲酒戒之在鬥，千祈唔好撩事生非。」
自言出身家貧，狄龍11歲已輟學：「我其實係半童工，做過送火水、送牛奶，人生滋味就好似一條抹枱布，五味雜陳，酸甜苦辣都喺裏面。」做到老學到老的狄龍，將參與6月公演的音樂劇《搭錯車》演出，扮演「啞叔」一角，83年電影《搭錯車》由孫越扮演「啞叔」，孫越更憑此角封金馬影帝，珠玉在前，首次做音樂劇的狄龍說：「電影睇好多次，有鼓勵作用，因為孫越始終係個好成熟、好有大器同內涵嘅藝人，我係好欣賞佢。今次高志森導演做我指導，冇乜叫做難，手語有啲複雜性，所以我有時做得唔完美，但臉上感情補足番。」
化妝：Josephine of J LAB
髮型：Mike Ting of HAiR
場地提供：8度海逸酒店
|
鍾意就快D Share啦！
|
|
|
