眨個眼，廖碧兒才醒起，離開無綫「都成8年喇！」。這幾年，為ViuTV拍了不少劇，《婚內情》新鮮熱辣播出，演鄧萃雯胞妹的廖碧兒，與姊夫陳錦鴻又有一段情。有誰估到，三個無綫人，在另一台再聚。
廖碧兒說，大台同新台最大分別，「𠵱家係好寫實！」即係唔會出現煮個麵你食呀、BBQ呀、又偷聽呀情節。
冇偷聽，有偷情。戲軌係，少女時代曾經愛上的男人，多年後重逢，原來已是自己的姊夫。「雯女做我家姐，但我哋有一種陌生嘅感覺，曾經好熟，但𠵱家係陌生嘅感覺呢，我係好熟（悉），我本身好做到！」
不論演戲或私生活，廖碧兒確被不少最熟悉的陌生人包圍。例如她重回溫哥華讀書，身邊同學不知道「廖碧兒」是誰；她與酒結緣，今年第十年了，有班志同道合好友。她說：「佢哋唔識中文，唔知我係邊個，所以我咪好鍾意囉！」
最熟悉的陌生人，當然包括情人。
撰文：文嘉龍
攝影：梁志永
| | |
轉型做番朋友
就在去年的這個時候，廖碧兒被拍得與億萬富二代盧啟賢（Calvin）蜜遊芬蘭，以為例牌答案是「大家都係朋友」，誰知廖碧兒卻公開認愛，越認越衰，掀出闊少曾離婚，又有個拍拖多年的泰籍電訊業富家女友Nina，關係圖錯綜複雜……最後廖碧兒公開斬纜，飛去加拿大讀書。
「咁覺得公開都OK啦（當時），我呢個年紀都OK公開，咁我覺得舒服就得。」分手原因？廖碧兒說：「咁遇啱嗰個lifestyle未必就到大家，有兩個唔同睇法嘅同時，咁咪轉型做番朋友囉！本身都係朋友，識咗一段時間，幾年㗎喇，變咗冇所謂，大家都做番朋友，始終我又轉咗拍嘢，我又去咗加拿大讀書，兩個人嘅生活就要好靈活咁去就囉！」
對方身邊早有另一半？「呢個我都唔係好清楚，新聞出咗嚟嘅時候，我都控制唔到，而我已經去咗加拿大讀書我放低先啦，我讀書先，我都返咗加拿大喇！」
情人變番朋友，未至於反面不認人。廖碧兒說與億萬前度仍有聯絡，「朋友一定有聯絡嘅，唔會因為新聞出咗而完全唔睬朋友嘅。Open to relationship呢樣嘢係OK嘅，但我始終係忙同埋要飛囉！我了解自己呢樣嘢，因為我都需要自己空間，我返咗加拿大讀書，走咗四個幾月，我都要空間去做我自己想做嘅嘢，當然你搵partner嘅時候你要去accept呢樣嘢囉！搵到就最開心」
最熟悉的陌生人，不止情人，還有識於微時的舊友。「我小學嘅best friend，佢係菲律賓人，結咗婚生咗仔女，佢啱啱嚟咗溫哥華探我。我哋其實超過25年冇見過，第一次見番要一個鐘頭講番以前嘅嘢。我冇諗過我做呢行，佢就不嬲都係玩音樂叻嘅，佢𠵱家真係做咗一個音樂老師，帶啲小朋友去全球比賽，佢老公我唔熟，第一次見，呢啲情況唔知點樣同佢傾偈呀！𠵱家變成點呢？會唔會講番以前嘅嘢會介意呢？呢啲我會諗囉！」
釀酒係生命過程
網上世界，天涯若比鄰，但廖碧兒說，見得到也未必真。「facebook都係得張相，或者幾句𠵱家嘅生活，但真實未必係一樣，你知好多人𠵱家post嘅都未必係真嘅，變咗你都會驚囉！我嚟香港之後，可能佢哋都會驚我變咗，佢會唔會唔一樣呢？因為我冇諗過會做幕前，我原本諗住自己會做醫生嘅。」
參選華姐前，廖碧兒大學時由醫科轉讀商科，再經選美舞台入行，從此世界不一樣。十年前機緣巧合下參觀酒莊，又變成另一種興趣甚至成為生意。「我唔瞓覺都要去做，酒行嘅朋友都知，我係可以癲到飛13個鐘頭過去逗留10個鐘，再飛返嚟13個鐘開工，因為摘葡萄嘅時間，每一年都一樣！去試酒嘅時候差唔多都一樣，我之前係每一年飛去三至四次㗎！」
廖碧兒說，葡萄成熟時，又像愛情，但更似人生。「釀酒嘅時候雖然係有啲葡萄喺度，但佢每一年都喺度變嘅，每一年個變化你係預計唔到，唔可以exactly，你只可以計到80%，到擺咗落個樽度呢，佢點樣去發揮（酵）呢，一年後飲佢、三年後飲佢，都會有唔同嘅味道，所以人生係好似酒咁，有不同嘅變化，雖然個根喺度，但你要同你個生活去變化囉！」
為了葡萄，廖碧兒可以凌晨4點鐘起身去摘，她說，關於釀酒的理論有好多書可以讀，但好多人從未真正「踩過地」，「最傳統係用人手，唔係機吖嘛，我釀嗰啲全部係手摘㗎，我哋九個女人坐喺度十幾個鐘頭，逐粒葡萄摘落嚟擺落個桶，先可以做成一個桶，which is三百支（酒），咁你做五千幾樽嘅時候就要好多時間。」
釀酒過程令廖碧兒覺得是一個生命過程，另一樣好處，這十年間因為酒，識了不少好朋友，而這些「好朋友」統統不知「藝人廖碧兒」是誰，也是另一種安全。「喺酒嘅世界我好lucky，喺嗰邊撞到嘅人全部都係老師級，所以我好好彩！佢哋唔識中文，唔知我係邊個，所以我咪好鍾意囉！喺法國葡萄園又好似我出世嘅地方（溫哥華），好多綠色，嗰啲山、嗰啲葡萄園係好舒服嘅，同埋我班朋友係唔會問我工作上嘅嘢。」
去年忽然傳出她早在04年已和酒莊富豪Jean-Charles Cazes秘婚，廖碧兒說：「大家都睇到，佢媽咪成日都like我啲post，其實佢哋喺香港仲多過我呀，佢哋啱啱離開香港仲留咗啲手信畀我，知道我今年未去法國啦，佢哋當我係女咁樣！」
屋企有一種安全感
真正當佢係女嘅，唔少得廖爸爸。廖碧兒說，相信全港都知她爸爸是全天候on call的「柴可夫司機」，每次見報都總見廖爸爸載着她。「我覺得係全香港都知，大家都叫我爹哋係『柴可夫司機』，無論係乜時間佢都會接我，好似今朝都係佢車我嚟。我爹哋教我同我家姐細佬，都係家庭行先，無論我幾大都始終係佢個BB女。如果有乜事發生，佢一定會出嚟，因為我家姐同細佬都有小朋友，佢希望畀到呢個訊息佢哋囉，工作幾忙，錢隨時都可以賺，但家庭得一個，我得一個爹哋、一個媽咪。」
與父親無所不談，「媽咪有時係比較sensitive，你知媽咪始終係媽咪，咁我爹哋好多時同我分享好多嘢，無論開心唔開心，啱定錯，我都同佢講先，佢可以幫我分析工作上嘅嘢、生意上嘅嘢，我由細到大屋企人行先。朋友冇得24小時一齊，始終喺屋企有一種安全感！我好彩，我同爹哋好close！」
做得她的伴侶呢，愛廖碧兒之餘要愛埋佢全家先得。「我覺得冇嘢可以強求、要求，係好難，因為你自己都始終畀唔到個時間，所以要搵到一個就到你𠵱家嘅生活，唔係話18歲吖嘛，我有好多嘢都定咗喺度，我有七隻狗仔，我間屋好大，你要唔怕屋企人嘅，有好多人可能係細家庭呢，一、兩個人OK，但10個auntie呀12個小朋友，咁可能佢哋就會驚。我屋企不嬲都係好多人嘅，所以要有一種包容囉！你唔係淨係愛我一個，你要愛我成家囉！哈哈哈！」
後記：灰姑娘
說到底，男人始終不及家人可靠，聲稱現在單身的廖碧兒，冇人愛，更加愛自己。「年紀開始成熟之後，我就覺得要平衡番生活，因為2011年嗰時，我整傷咗條腰骨，因為拍嘢嘅時候，冇人幫你㗎喇，你一定要幫你自己。如果我真係行唔到嘅時候，咁點算呢？有邊個人會愛你，有邊個人會幫你呢，𠵱家你真係要錫身，你真係要錫自己，因為你唔錫自己，冇人會幫到你，因為你喺張床度，邊個人嚟探你，邊個人嚟關心你，你開始真係去諗喇，當我出返嚟，因為做手術都未必會好得番，如果我真係行唔番咁點算呢？」
廖碧兒說：「你唔知幾時會發生乜事，咁就開始愛番我屋企人多啲，屋企人係好重要，因為由頭到尾佢哋都係好支持我，無論發生乜事，無論見到乜新聞都好，佢哋都會第一時間喺你身邊，乜嘢都見證晒！」
2011年。那年，正值廖碧兒決定離開無綫，還自爆與陳豪早於08年已分手的時候。煙消雲散，拜金女都變黃金盛女了。
講到歷盡滄桑咁款，其實廖碧兒才不過40歲，女人四十，總渴望穿上婚紗的一天。「女仔當然係想結婚㗎啦，有嗰種『Cinderella Story』係最開心，我由細到大都喺迪士尼故事長大，嗰啲公主故事咁……」
只是，《灰姑娘》的恐怖童話版，廖碧兒可能未聽過。
服裝提供：Phase Eight
|
鍾意就快D Share啦！
|
|
|
