劉美君說：「我真係一個好鍾意談戀愛嘅人！」婚，結過兩次；戀愛，談過無數場，最近的一位，是拍拖8年的混血兒男友Steve，也在2017年分手，她曾在網上吐心聲：「兩個人要掙扎來維持，倒不如分開，勉強無幸福。」
分手後的日子如何過？54歲的劉美君說，她老友梁家輝說她「一世人都淨係識拍拖」，這兩年，劉美君沒有拍拖，只享受dating的樂趣，反而不想再要一段關係，因為「當你一認定咗佢，佢就『拚pair』，一『拚pair』就冇咁緊張㗎喇！」
情場老手經驗之談的結論是：「個個都係咁嘅，初頭就鬼咁錫我，跟住就一路個個走下坡，但係我唔係吖嘛，我真係愛你十年，我十年之後都係咁鬼可愛㗎，但對方做唔到，我咪寧願唔要囉！」
純約會，進一步接觸？No！畢竟不是唱《午夜情》、《事前》、《事後》的年代了，劉美君的新歌叫《親密距離》，曖曖昧昧，才好玩！
撰文：文嘉龍
攝影：梁志永
| | |
一世人都淨係識拍拖
被梁家輝成日笑她「一世人都淨係識拍拖」，所以呢兩年，劉美君一於「解咒」，真係冇拖拍。「我上次都同佢（梁家輝）講，我起碼贏咗兩年，我真係冇officially咁拍拖。」
劉美君說：「我諗我對愛嘅睇法有少少唔同咗，因為我發覺我唔需要一個長期嘅人喺身邊。」現在好享受約會的樂趣，「我𠵱家好enjoy dating，我enjoy人哋約我，可能我同佢睇咗十次戲都得，或者嗰個同我食咗四、五次飯，我都唔覺難受喎，咁但係我係咪同緊一個人拍拖呢？咁又唔係，我只係好enjoy嗰個應約囉！」
甚至乎與混血前男友都一樣繼續dating。「嗰種關係好難答你，其實係好曖昧嘅。我同我男朋友（Steve）真係好close，我哋仲係朋友，譬如我返去美國，我哋一齊去滑雪，一齊去玩去行山，咁係咪拍拖呢？變咗我冇去define呢樣嘢，𠵱家我唔去define呢樣嘢，但我又唔係濫交呀吓，年紀大咗個感覺同個需要唔同咗。」
「大家食餐飯，如果你唔鍾意嗰個人，你都唔會對住同佢食餐飯啦，但係咪拍拖呢？我又唔係日日對住佢，又唔係有乜嘢特別嘅不尋常關係，永遠都有一個距離喺度，𠵱家就係我最鍾意嗰種感覺。」即係男友可以冇，兵唔怕多！
不如不愛
學懂收放自如，也是從無數戀愛過程中得到教訓，「其實男人好多時候都係咁，當你一認定咗佢，佢就『拚pair』，一『拚pair』就冇咁緊張㗎喇，可能text你嘅次數都冇咁多，同你睇戲食飯都少咗，咁你不如唔好要。」
劉美君說：「我都同Steve講，你𠵱家衰啦，冇咗我就對我咁好喇！佢冇咗我反而對我好咗好多，佢sweet咗好多呀個人！因為拍咗8年拖之後，個人『放pair』㗎嘛，使乜咁緊張，反而分咗手呢，佢對我好細心喎，我哋仲約埋去滑雪又去玩！或者我之前咁多段relationship都係咁，8年、10年、11年，但係你哋個個都係咁嘅，初頭鬼咁錫我，跟住就一路個個走下坡。好多人都話感情個個都係咁，但係我唔係吖嘛，我真係愛你十年，我十年之後都係咁鬼可愛㗎，但對方做唔到，咁我咪寧願唔要囉！」
我唔想再出唱片
由情人昇華變成親人的感覺，對戀愛大過天的劉美君來說，完全接受唔到，「我真係一個好浪漫，真係一個好鍾意談戀愛嘅人，我係一個好嗲嘅人，我真係愛你十年都可以好愛你、好嗲、好溫馨，我可以不停畀surprise你，好浪漫做好多嘢，但係當你發覺頭三年佢都有份參與吓，但之後嗰五年都係得我自己做獨腳戲，咁慢慢你就會覺得點解我要掉低咁多，我事業上仲有咁多好玩嘅嘢未做，淨係服侍一個人？」
分散投資
分手後，舊愛反而對自己更加細心，劉美君的身邊人都說，混血前度Steve是最大機會翻撻的一個。「因為我身邊好多人都好鍾意佢，我哋兩個其實好夾，無論從表面證供外形，又鍾意做運動，真係差唔多滿分㗎接近。真係要睇緣份啦（復合），佢𠵱家久唔久都會飛過嚟探我，因為佢好鍾意Asia，佢好鍾意嚟呢邊食嘢，就算佢再追唔追我都好，我都會轉一個方式，要轉型呀，唔可以簽死份約，你唔簽死份約呢，啲人做part time勤力啲㗎，驚冇咗份工嘛！」
唔簽長約，將自己當part time，對大家都輕鬆。「只要我認定咗呢，我個人自不然就好似湊仔咁，我個人好緊張，變咗就有一個負擔，因為有一個『男朋友』呢個字，𠵱家我呢啲唔負責任嘅嘢，得閒食吓飯睇吓戲，好開心喎嗰種感覺，又唔使負責任，又唔俾大家去過線，變咗我可以繼續好focus我嘅工作，因為佢唔係一個fix咗嘅男朋友，唔使要顧住佢。」
分散投資，唔使落重注，可能冇咁傷。正如劉美君的事業，兩年前決定由美國返港再「定居」，重新投入事業，沒有拍拖的日子也夠她忙，又《全民造星》導師，也為ViuTV自監自演《好人好姐》，新衝擊令她好有滿足感。反而老本行，唱歌，劉美君說以後不會再出唱片了。
「我啱啱先同我老闆講，我唔想再出唱片，因為唱片十隻歌，你最多plug三隻，你𠵱家賣碟賣到一萬隻已經係好風光好威，個個走嚟恭喜你，自己真係多謝都唔好意思啦，一萬張個個恭喜我咁樣。令我最唔開心嗰樣嘢係做宣傳，好似你去電台宣傳隻碟，但係講碟嘅時間好少，有90%係講咗第二啲嘢，因為根本冇人理到我隻碟係點……咁我以後唔想再做大碟囉！」劉美君說。
86年已唱起自己填詞的「Jay，一張醉臉儍癡癡」的《午夜情》，經歷33年，樂壇同娛樂圈都變天。「我唔係好知𠵱家個社會其實係點樣，除咗做《全民造星》對住班細路，我先知原來係咁㗎，我對娛樂圈係點都唔係好知，我只知啲人成日話我，邊使咁做㗎，唔使咁嘥心機喎，我就諗『乜𠵱家真係咁求其咩？』」
成日提住自己係阿嫲
打算不再出唱片的劉美君，歌，還是會唱的。令她更雀躍，是首次為ViuTV自監自演《好人好姐》劇集，有《來生不做香港人》的導演班底，劇中劉美君做江若琳母親，三代同堂做埋婆婆，現實中，劉美君亦是兩個乖孫的嫲嫲，可說是最潮嫲嫲。
「其實原先我嘅唱片公司有呢個憂慮，好似個吸引性會低咗，明明靚靚咁樣，但係又成日提住自己係阿嫲，好似好唔好聽，令人好turn off，但係我個人就係好任性，我堅信一樣嘢就係，你個人係attractive就係attractive，唔會因為你話俾人知係阿嫲就唔attractive。有啲三十幾歲嘅男仔，唔係太知我個背景，我話俾佢知我幾多歲，佢哋都會話：you are so hot！」
這個嫲嫲兩年前決定由美國回港，幸好仔女們都好支持，現時每日都會和孫仔孫女FaceTime。「啱啱識叫我做嫲嫲嗰時，我好開心。我𠵱家日日都同佢哋FaceTime㗎，因為我驚佢哋唔記得我吖嘛……我第一個孫，佢未開過罐，即係未食過baby food，佢食嘅所有嘢全部都係我整，全部organic，食到三歲幾，就係由我決定返嚟香港開始搞《千色》（演唱會），我同我啲仔呀女呀、我媽咪請晒假，話我要創一番事業，開始唔負責任喇，佢哋好支持！」
曾經抑鬱
除了是最潮嫲嫲，劉美君又是娛樂圈的「美魔女」。「生活要檢點先啦，我又冇煙冇酒早睡早起，我食嘢又奄尖，拍戲我都係另外買嘢食，大陸拍戲我就係另外請廚師煮飯畀我，香港拍戲我係特登叫劇務去街市買餸，然後搵間酒樓蒸畀我，我係好緊張身體㗎！同埋mental health（精神健康）好緊要，唔開心食得幾好都冇用，情緒唔好瞓得唔好就會好差。」
估唔到嘅係呢位健康潮嫲，原來都有過抑鬱症。當年與首任丈夫黃泰來導演結婚，生下大仔之後，得了產後抑鬱。劉美君說：「我生完第一個BB有depression，醫生話我聽係產後抑鬱，我老公（黃泰來）仲話我搵藉口，想搵個藉口搵人發吓脾氣扭吓計咁樣，我好明白當有屋企人唔體諒你嘅時候係有幾痛苦，𠵱家我就梗係講就輕鬆，過晒嗰啲烏煙瘴氣嘅時間啦。我睇番啲相，我廿幾歲嗰時，個樣都幾難睇㗎，雖然係青春，但真係殘，當人有憂愁嘅時候真係殘啲嘅。」
後記：由劉德華到沈震軒
睇劉美君的IG，出鏡最多的除了各種高難度瑜伽甫士相之外，應該都是《好人好姐》各種近況分享。劇中除了與江若琳演母女，更與沈震軒談起姊弟戀。
現實世界比沈震軒大18年的劉美君說：「講真畀你聽，打從我十幾歲女，追我嘅男仔呢，唔知點解個個都呃到我，個個咁高大，其實個個都細過我，咁問題係乜嘢呢？就係因為我個樣細個，好似Steve都係細過我嘅，除咗我結婚嗰兩個老公，我話要揾個老啲先得之外，拍拖嗰啲個個都細過我，九成都細過我，唔係我特登要去搵。」
7歲已經出道拍教育電視的劉美君，早在出唱片大紅前已經跳上大銀幕，1981年16歲拍港台劇《江湖再見》，同劇遇上劉德華，到83年邵氏開拍《毀滅號地車》，導演霍耀良點名劉美君演越南妹，與劉德華合演情侶。
當年的劉德華到今日的沈震軒，愛過無數螢幕男孩們的劉美君，點夠佢玩？
場地提供：Harlan's（The ONE）
髮型：Gary Sun of Hair Corner Central
化妝：Hubei Har
服裝：MOSCHINO
|
鍾意就快D Share啦！
|
|
|
