TVB一向都唔會提及其他電視台嘅事，更曾經連友台嘅咪牌都要打格，驚死幫人哋做咗宣傳咁。不過ViuTV就唔同喇，開咗個節目叫《友枱VIP》，廣邀嘉賓細訴大台軼事、拍劇點滴，其中一集嘉賓羅家英更講起TVB唔尊重老一輩藝人，搞到汪明荃Liza姐都曾經唔開心到想劈炮唔撈！
節目由武指世家劉家榮兒子劉永健，夥拍洪金寶新抱周家蔚做主持，每星期邀請圈中好友猛人傾吓偈，早前嘉賓家英哥被問到「喺電視台有無試過不被尊重？」佢就答：「對我都算係幾好，可能因為阿姐關係啦。不過我知道Liza拍得唔係好開心，Liza曾經想唔再續約，於是打電話畀邵逸夫，直接同佢講。咁邵逸夫就直接留返佢，叫佢『唔好啦唔好啦』咁樣。因為公司已經換晒人，同Liza合作批舊同事完全轉晒人，咁啲新人唔重視Liza喺台嘅地位，同埋曾經對公司嘅貢獻。啲人覺得：『關我乜事？你係上一代嘅人。呢度係咩地方？索性唔用你囉。』忽視咗Liza嘅存在囉。Liza曾經好嬲㗎，想唔撈㗎，咁樣囉。」
連汪阿姐都可以咁樣對待，係威嘅，難怪Ming Sir劉兆銘都曾遇上不愉快事情，直接唔撈走人，事關家英哥話：「一年一騷呢個問題，我聽劉兆銘講嘅。原來Ming Sir要同TVB簽約，簽完約一出個門口，嗌佢返轉頭話：『劉生，你已經超過60歲，呢份約我哋要取消，要簽過另一份約。』大家都唔記得咗佢60歲，劉兆銘亦都唔知一年一個騷，咁劉兆銘同佢講話唔簽要走喇。後來佢喺澳門同我拍緊一套戲，佢拍晒枱好嬲。其實佢已經準備拍唔知《茶是故鄉濃》定《酒是故鄉醇》，同公司做好晒溝通工作諗住去拍啦，都搞到唔拍唔做喇！」
值得尊敬嘅影視界前輩都受咁嘅待遇，其他人咩景況真係唔使多講。
來源 source: http://nextplus.nextmedia.com
|
鍾意就快D Share啦！
|
|
|
