60歲嘅艾威，四年前佢太太Lisa，割掉十四磅重嘅子宮巨瘤後，一度病情告急，前後做咗三次大手術。為救愛妻，艾威不惜花光百幾萬積蓄，當時面對因HKTV開台不成，影響收入，加埋老婆醫藥費開支龐大，經濟上可謂雪上右霜。不過喺當時傾家盪產嘅光景，佢卻冇放棄21個小朋友嘅助養費。
婚後一直膝下無兒，但艾威卻有對孩子付出嘅為父之心，分分鐘比起與孩子有血緣關係嘅爸爸，更守承諾同堅持。
問佢經濟最困難時候，有冇一刻念頭想斷供，佢話:「完全無掙扎過。
你生活困難時會唔會諗唔養啲狗，因為要慳返伙食錢，唔會嘛！因為基本上佢已經係你生活一部分。
其實好簡單，我覺得唔需要太過標榜「助人為快樂之本」、「福有攸歸」，反而我覺得四個字，就係「我做得到」，呢個就係唔放棄嘅原因。
我唔係好贊成，中國人經常喺慈善行動上帶出一啲錯誤信息，好多人經常話「福有攸歸」、「善有善報」、「助人為快樂之本」，好多嘢如果係咁樣作出發點，就會變咗所有嘢都係為咗自己去做。
反而我覺得幫別人只有一個原因，就係「做得到」，就係咁簡單。」艾威說。
做「長腿叔叔」，由97年開始。原因，竟然係咁……
「當初助養小朋友嘅原因，我唔知道應唔應該喺呢度講，就係喺拉斯維加斯贏咗錢，賭錢呢個行為好似唔係太健康，但我覺得助養小朋友呢個行為，係應該值得推崇。」
不過22年來，與21個助養小孩互相寫咭問候外，呢位現實版長腿叔叔，從不希望同佢哋面對面一聚。
「或者我係一個比較冷漠嘅熱心人，因為我唔想太過加入佢哋嘅生活圈子，只認為做自己應該做嘅嘢，唔想同佢哋有太多感情交流。可能有啲人會覺得好冷酷無情，但我覺得唔需要做呢樣嘢，要做嘅已經做咗，因為佢哋本身都有屋企人，唔係孤兒。」
兩公婆二人世界多年，有冇諗過領養小朋友，一嚐做父母心願？
艾威笑一笑:「我領養隻狗就夠。」
去年佢老來得「子」，領養一隻毛孩叫 Sashimi，將艾威夫婦生活從此翻天覆地，佢享受被「兒子」改變，萬事以Sashimi為前題。
立即下載APP，精彩內容壹手掌握
下載連結： http://bit.ly/Next29App如對會員訂閱制遇到任何問題或意見，你可以致電 2623 9985，或電郵聯絡客戶服務主任cs@nextdigital.com.hk，我們定當盡力協助！
來源 source: http://nextplus.nextmedia.com
|
鍾意就快D Share啦！
|
|
|
