前輩級歌手張武孝（大AL），17歲夾band入行，在酒吧唱夜場，又做過的士高睇場，晚晚流連夜店的他，有過幾段轟烈愛情，但受父親不理家影響，於96年近50歲才娶港姐太太黃燕芳，之後三年內成為一子一女之父。大AL覺得男孩子要有承擔，所以對兒子要求特別高，更坦言：「有時鬧佢我會加兩句粗口。」
撰文︰祖李
攝影︰沈健程
相關新聞：【蘋聞重溫】同楊寶玲李美鳳同屆
現年69歲的張武孝年近半百才娶妻，一隻冇腳的雀仔突然鳥倦知還，全因當年他在天津患上感冒，他說︰「當時冇諗過結婚，一個單身漢好自由，啲人介紹明星同女拍檔畀我，我都唔要，佢哋仲以為我係基佬。不過有次患感冒，工都返唔到，一個人瞓喺間大屋，辛苦之餘冇嘢食連水都冇，突然覺得好淒涼，做嘢叻又點？都冇人同你分享，嗰陣開始覺得要搵番個伴，但我想搵番同聲同氣嘅香港人，溝通同文化差異冇咁大。」
唔鍾意爸爸
病癒後返港，大AL即致電模特兒公司經理人好友Ben，叫對方介紹女仔，開宗明義想成家立室，年齡25到35，離過婚都冇問題。他憶述︰「佢介紹咗𠵱家太太畀我，我哋就開始約會，約會冇耐就結婚，所以緣份好講timing。」談到遲婚，大AL說受父親影響很大，當年父親長年累月不理家庭，由張母獨力湊大兒子，令他對婚姻沒信心︰「我差唔多單親長大，老竇有同冇都冇分別，一個唔完整家庭，對仔女成長好大影響，所以自己唔夠穩定，唔會貿貿然結婚，唔想害咗下一代。」他說少年輕狂，年輕時試過因為失戀意氣消沉︰「痛苦嗰陣係諗過死咗就算，但諗深一層，點對得住媽媽，自然就企番起身。」
大AL說做父母是學習的過程，以前他很嚴，現在卻變得隨和︰「我好唔鍾意爸爸，佢以前會攞住支棍係咁打我，但最初我做老竇時，都係用番佢呢套，但中途就發覺好唔妥，因為越壓迫，小朋友抗拒越大，就算佢認同你嘅道理，把口都唔服，反而同佢哋做friend，間唔中講吓道理，就算佢𠵱家未明，都會袋住先。」大AL覺得男孩子要有擔當，所以對兒子要求特別高︰「個仔一直都覺得我錫家姐多啲，我解釋因為男仔要獨立，但佢唔接受，有時鬧佢我會加兩句粗口，但個女我就唔會，加上個女係成熟同聽話啲。」
相關新聞：市井歌唱到冇靈魂
被斬斷手指
其實，大AL也經歷過反叛期，幸好音樂令他找到人生目標。當年他自組樂隊Bus Stop，之後被佳視睇中組成玉石樂隊，當時林子祥（阿Lam）前妻吳正元在佳視任編導，就引薦了林子祥加入玉石樂隊成為第二主音︰「但我哋合作只係半年左右，主持節目《玉石之音》，之後阿Lam先退出，後來無綫向我招手，但只肯簽我個人，考慮好耐最終都係決定單飛發展。」
大AL八年前回歸樂壇，偶爾參演電影及電視劇，飾演社團叔父角色入型入格。曾經在的士高做睇場的他，原來曾被人斬斷兩隻手指，甚至被插穿肺部，他說︰「當時做藝人對社會認識唔深，得罪咗人都唔知，唔好以為自己正面、冇錯就得，可能你同A講咗一句好好嘅說話，但就唔覺意得罪咗B。最慘係媽媽見到我喺手術室推出嚟，佢即刻暈咗要住幾日醫院。」
場地提供︰Lanno's Studio
|
鍾意就快D Share啦！
|
|
|
