「唯唯」梁競徽（前名梁烈唯）最近成為「逃犯條例」遊行示威中的「吉祥物」，多次成為被惡搞對象，屢遭網民改圖「被遊行」，甚至將他的肖像印在示威物品上街，高呼「唯唯」的名字。早前他更意外衝出國際，在歐洲新聞節目Euronews上，影到有示威者高舉「唯唯」的海報。
由「負皮王」變成「愛國愛港真男神」，但其實真正的唯唯都好愛家。昨日下午二時許，唯唯陪同太太駱保雯（Tina）和2歲的囡囡梁亦彤（Karina）一家三口，穿上黑白家庭裝到西貢半日遊。唯唯泊好車後，便與太太和囡囡走入一間茶餐廳食午飯，Tina負責餵囡囡食飯，臨走前還將未食完的食物外賣打包返屋企，好有衣食。大約半小時後，唯唯一手抱住囡囡先行出茶餐廳，並順勢用手幫囡囡擋住猛烈的陽光，又抱囡囡睇魚缸內的大魚，表現慈父一面。
唯唯和和太太先返停車場，將外賣放上車，問到對近日「被遊行」及登上外國新聞有甚麼回應？太太先護航：「唔好喇，我哋趕時間呀，唔好意思呀！」唯唯亦避而不談說：「冇呀，thank you！」全程表現得好禮貌。之後他們從車尾箱拿出一架滑板車畀囡囡玩，不過，2歲的Karina似乎仍未能控制得好好，左搖右擺，唯唯見囡囡差點跌親，即敏捷地一手扶住她的pat pat，看得出非常緊張女兒，之後與Tina一人扶住一邊，讓囡囡可以安心前行。
由於昨日天氣酷熱，囡囡玩了一陣已滿頭大汗，當她扭計時，唯唯便再次一手抱住囡囡，另一隻手拎滑板車，隨後三人一齊走入街市買餸。見唯唯好熟悉街市環境，買甚麼均全部由他發辦，據悉唯唯平時好喜歡下廚，不用開工便由他做大廚，負責煮飯畀屋企人食。大約半小時後，唯唯負責拎重物，而太太則拖住囡囡上車離開。
晚上唯唯疑不滿網民不停在其IG不斷留言，表揚他繼續遊行，把心一橫將IG整個帳戶刪掉。之後再到微博發聲，表示：「心情好，做菜！心情不好，做菜！別再問我有沒有去。。。懂我的您，根本不用問也知道。」看來心情似乎不太好。
採訪、攝影 : 徐錦池、孔志豪
-----------------------
你撐蘋果 我捐$1
支援反送中抗爭者
|
鍾意就快D Share啦！
|
|
|
