真，無論傅穎怎樣說，別人都會當成假。尤其說到她的樣子進化史，要幾膠有幾膠。
這天，一身韓系造型亮相的傅穎說：「聽到冇晒感覺喇！可以諗到進化幾點零version呀，或者係膠呀，其實我諗，膠嘅定義係乜嘢呢？你真係覺得我係膠咩？難道我每次見你都要落晒妝畀你睇？」
妝，她卸過，還拍片放上網，但一樣被膠言膠語衝擊。傅穎說，膠即是假，「我覺得我好難去爭取得到任何人嘅歡心……講膠呢樣嘢講咗咁多年，其實膠即係假，即係人哋話你咁膠，未必係話你整容，而係講你個人好假。」
好多真話，其實說不得。她曾在網上寫道：「想想香港還有個女藝人，叫傅穎，被人批評、恥笑、攻擊、往死裏寫、往死裏屈，她還好好的活着呢！你還有甚麼好愁的？」如今有一半時間在北京生活的傅穎，不再身處娛樂圈風眼位，在北京街頭亦未必有人認得，但至少，活得快樂。
撰文：文嘉龍
攝影：梁志永
| 資料圖片 | |
變咗兩頭唔到岸
看傅穎的網上各式留言，網友創意簡直大爆發。明明只係甫張靚靚相，留言都會問「可唔可以share醫生contact？」、「今次係第幾次進化？」、「眼頭闊到唔合理！」……死未？
傅穎未死，她更試過在網上還拖回應：「我唔係叫反擊，係內地有一個工作人員，佢睇到有一個新聞，又話我膠喇，係去首爾時裝周，話我去嗰度整容。首爾時裝周得五日時間，日日做嘢都已經冇乜時間咁滯，都要話你整嘅……我就覺得好得意呢件事，我發覺香港都有artist好似我咁樣，一樣俾人攻擊，佢哋都會覺得好難頂，有啲artist亦都話有情緒病，咁我係一個過來人，我覺得如果我到𠵱家都可以生活得咁好，都可以咁開心，你哋冇可能走唔出嚟嘅！」
除了樣子的膠，令傅穎更介意的，是說真話也被人覺得是假，她也曾反省，「我唔想假，但係又要適當地講啲嘢，咁咪變咗兩頭唔到岸囉，大家覺得你故弄玄虛，呢個就係我嗰時最大嘅問題，後尾有啲記者朋友同我講番，點解你會成日有位俾人入到你呢，就係你啲咁嘅性格，我諗太多，你一係直接講個事實出嚟，一係講個假嘅，唔好兩頭唔到岸！我唔想講個事實喎，但唔講又唔得，變咗大家會反而覺得你假。」
假，未必是整容。「我覺得我好難去爭取得到任何人嘅歡心，可能我唔係得到大部份人嘅共鳴，但係我都可以有我嗰個圈子嘅共鳴囉。網民，我冇辦法去control佢哋諗乜，或者去改變佢哋對我嘅印象，講膠呢樣嘢講咗咁多年，其實膠即係假，即係人哋話你咁膠，未必係話你整容，而係講你個人好假。」
傅穎說：「如果我真係做到一個咁膠嘅人，我就唔會喺呢個圈咁樣走過嚟！我應該會一帆風順，或者得到更多嘅嘢。我做旁觀者跳番出嚟去睇呢個圈，你越識得膠，你得到嘅喝采聲就越多，當你太真實，人最怕就係接受事實嘅真相，當你成日覺得要擺個真相出嚟，其實冇人想睇呢個真相。」
時光倒流未必有Guts
真相係點？傅穎說過。當年一直死口唔認與羅仲謙拍拖的她，2011年出發往北京發展前，忽然公開戀情，年半來復合又分手，更大爆男方腳踏四船兼曾發生家暴事件。當年的愛恨情仇，八年過去了，羅仲謙亦早與楊怡結婚。
大家都是圈中人，這些年有碰過羅仲謙嗎？「真係冇撞到喎……始終都係過去式，如果我到呢一刻仲係好mind好care嘅話，嘩，咁真係唔得，我個人真係會好唔開心！對於我嚟講𠵱家已經唔係啲乜嘢喇，但係你仲要去提番人哋個名，反而對人哋有影響，因為對我其實冇乜嘢，都已經過咗去，如果又再講番以前嘅嘢，可能會俾人話係咪用某某嚟做新聞，咁我寧願唔講。」
緣盡了，真的連碰也沒緣碰一面。傅穎一直用「嗰件事」或者「嗰單嘢」來形容，如果時光可以倒流，她說未必有膽公開戀情和說出所有情況。「講真一句，如果時光真係可以倒流嘅話，我諗我未必咁有guts去公開，嗰時真係因為年輕，因為細個。點解唔打算再公開？因為到咗你大個嘅時候你會發現，你講咗出嚟有時候係冇用㗎喎，有乜用呢？可能係嗰啖氣，係你自己覺得委屈，so what？人生經歷咁多委屈嘅事，𠵱家畀我就唔會講，可能自己吞咗佢就算囉！」
好多人都唔信你？「我個樣亦唔係一個乖乖女樣，好多人睇嘢好表面，覺得你呢個樣呢個造型，你就唔係一個乖女，覺得你一定係做新聞。我怪自己嘅就係唔識講嘢，自己又好強，其實好多人都講呢句，『會哭的孩子有糖吃』（用普通話說），識喊嘅細路仔就有糖食，但係我係一個無論有乜事，我出到嚟就要扮到自己好強嗰種，大家就唔會覺得你係一個受害者。」
後悔嗎？「冇得後悔，因為你都做咗。點講呢？委屈就一定有，我覺得呢件事係對自己一個傷害，even呢件事你唔講出嚟係冇人知，你依然可以繼續出嚟做嘢扮吓開心咁，但嗰時我自己都為呢件事suffer咗好多嘢。嗰時我細個，我覺得我又唔係講大話，點解大家會覺得我係錯？你睇人哋嘅事都好，所有人討論緊一件事，我哋其實都係周邊人，冇人會知內裏發生緊乜，我哋睇嘅嘢都係好表面。經歷咗嗰件事之後，對我嚟講就好似坐過山車一樣，即係去到最低最低最低個位，可能以前一啲以為係朋友嘅，喺當刻嗰個moment，全部都唔係朋友，你可以睇到好多嘢囉！」
突然間冇晒朋友
都係嗰句，娛樂圈好難有真朋友。「好難，我到𠵱家都係咁覺得，除非你喺呢個圈入面大家係冇得比較嘅，好似我同男歌手係friend嘅話，可以真係好friend，因為冇嘢可以比較；圈入面女仔同女仔之間嘅友誼係好難嘅，我身邊大部份同我係鐵膽嘅人，基本上都唔係呢個圈。」
娛樂圈朋友，也可以一夜之間消失。「我記得我曾經喺23歲（08年）生日嘅時候，我開咗一個生日party，嗰時係我金髮嘅時候，我請咗好多人嚟我個party，嗰時喺中環嗰間paparazzi（酒吧），我仲記得呢件事，嗰時真係好多人嚟我個生日party，但係當我一出事嘅時候，無論係經歷公司轉會，或者係嗰單嘢，比較嚴重嗰單嘢嘅時候，出到嚟你發現突然間係冇朋友嘅，所以我自己會揀，我留啲乜嘢朋友喺身邊，我留嘅朋友係一啲真係我有乜嘢事，佢會出嚟保護我嘅朋友，我唔需要嗰啲好表面嘅朋友。」
Cookies餅女出身的傅穎，一直都與其他成員有不和傳聞，與Stephy和Kary等人亦不見有閨密聚會，多年來有否覺得被人孤立？「我成日都覺得呢件事係好得意嘅，你諗吓Cookies成立，九個人維持一年、四個人維持一年，加埋兩年然之後單飛發展，我可能係一個exception（例外），冇話同佢哋走得好埋，中間係有好多問題，好難用一、兩句說話去講完。我覺得女仔多嘅地方，就係是非多嘅地方，我唔係話佢哋好多是非呀吓，我唔係呢個意思，只係女仔多嘅地方我係會驚嘅，尤其呢個圈子入面，我覺得娛樂圈嘅真友誼，非常難得，如果遇到，一定要好好珍惜，但係我到𠵱家都未遇到一個女演員，係可以玩得好friend好friend，暫時未有。」
仲有冇聯絡？「真係冇聯絡，有陣時可能會有啲WhatsApp係"Happy Birthday"，但冇話約出嚟食飯，但係好似生BB呀結婚呀生日呀，咁就會有一、兩個咁嘅message。我哋冇深仇大恨喺入面，只不過真係咁多年嚟，我哋冇話一齊玩！」
後記：我會快樂的
是傅穎的書名，她還寫過另一本叫《在摩天輪上》的書，更經典是她在書展發生的「UFO裙」事件，都是當年網民的熱話。那本《我會快樂的》，是寫「傅走音」的心路歷程，今天傅穎再提起，沒事一樣。
「𠵱家冇晒事喇，但係我嗰時真係有情緒病嘅時候，我係唔知道自己係有情緒病嘅……最嚴重嗰次就係俾人笑嗰次，『傅走音』嗰次囉，唱《花吃了這女孩》，嗰次係一個澳門騷，我出場前有一種感覺，就係全世界都睇我點死，到我出場嗰刻係一片空白，隻耳直頭係『焚焚聲』聽唔到自己唱緊乜，聽唔到音樂……嗰時我都唔覺得自己係情緒病，我淨係覺得係太緊張。」
現在的情緒當然冇問題，一半時間在北京、一半時間在香港，傅穎生活得很開心。「我細細個17歲就出道，喺傳媒嘅聚焦底下，咁當然唔係一個好紅嘅聚焦啦，但係都會有狗仔隊，但係喺內地，等如你係一個普通人，我唔化妝踢住拖鞋咁去睇戲、去食飯去見朋友，呢啲係我以前喺香港比較少嘅，可能係我自己放唔開。」
說來弔詭，34歲的傅穎在北京反而識到香港藝人。「好似啱啱返咗嚟香港發展嘅海仔海俊傑，Samuel彭敬慈，我𠵱家隻貓同佢嗰兩隻貓係friend嚟㗎！我喺香港嘅時候反而冇乜點樣出去識朋友，但我喺內地就反而識咗一班香港人。」
這天約傅穎在北角一間新酒店進行訪問，有一段日子沒有回港的她說：「我發覺𠵱家啲人個個都好似好嬲、好唔開心咁！」
香港人，的確好難開心。
場地提供：Hotel VIC海匯酒店
|
鍾意就快D Share啦！
|
|
|