黃澤鋒今年初在facebook宣佈即將做爸爸，52歲太太陳麗麗造人成功，兩夫婦結婚多年都希望生小朋友，最終願望成真，「鋒嫂」陳麗麗甘冒超高齡產婦之險，上周一為老公剖腹誕下囡囡「小黃妃」。
黃澤鋒今日凌晨於fb報喜，並貼出捉着囡囡腳仔的照片，他留言：「歡迎你的來臨，#幸福並不是必然的#生死一瞬間 感恩我們可以⋯#三人行#小黃妃#和你一起繼續走。」
其實「鋒嫂」陳麗麗陀女時出現妊娠濕疹，必須戒口，小心翼翼的9個月終於過去。黃澤鋒與太太陳麗麗擇好日子，上周一入院迎接囡囡，可惜原來生產過程曾出現狀況，有驚無險。
黃澤鋒今日接受《蘋果》電話訪問時說：「小黃妃上周一已出世，媽咪去到周六先出院，托賴有驚無險，兩個都平安，我最安慰。初初我陪太太入產房，想睇住小朋友出世，好開心，但太太最初半身麻醉，但腳腫藥到唔到，變咗要全身麻醉，醫生突然請我出手術室，我當時好驚，心離一離，好忐忑，唔知點講同點做，嗰半小時係我人生唔知點做，又唔可以躁，唔可以發脾氣，要冷靜，始終醫生最專業，我只有喺度等，等等等，嗰半個鐘頭好難過。」
半小時捱過，黃澤鋒續說：「之後姑娘請我入去，佢話小朋友出咗世，你入去剪臍帶，我即刻衝入去，姑娘叫我唔好望左面，因為急救緊太太，右面係小朋友，醫生話囡囡唔係好喊，我就鬧囡囡『喂，你做咩？』結果佢就喊，佢一喊就冇咩事。我咪回頭睇太太，佢正縫針，醫生話十分鐘就得，會同我搞掂太太，醫生之後解釋太太生時血壓唔降，有機會中風，做手術升得好緊要，臨界點去到妊娠毒血爆發，產婦有機會中風，唯一可以救係小朋友出世，媽咪就冇事，好好彩。我見太太唔醒，我搖醒佢，周一剖腹，周六先出院，母女產後都入咗ICU，要唞夠。」母女經過醫護人員悉心照料，身體都回復健康，昨日平安出院，一家三口回家，黃澤鋒才安心貼相報喜。
這次入院發生突發意外，母女產後入住ICU，費用超出黃澤鋒預算，他說：「最緊要佢哋冇事，錢使咗可以搵得番。」
問到囡囡情況？黃澤鋒說：「小朋友出世有6磅重，似我好多頭髮好可愛。」由一家三口相中可看到「小黃妃」的確眼仔睩睩，對鏡頭敏感度強，媽咪陳麗麗也顯得精神。黃澤鋒表示感謝太太「搵命博」為他生女，承諾要痛錫妻女：「太太搵咗表妹嚟陪月，我叫佢好好休息。」
------------------------------
【每周送10萬】
升級壹會員獨家尊享，立即參加10萬火急大抽獎!
*推廣生意的競賽牌照號碼：52302-9
-------------------------------
錶迷必讀！
89頁腕時計電子書 66款嚴選年度新錶
https://hk.adai.ly/e/v7jEA0MC1X
|
鍾意就快D Share啦！
|
|
|
