48歲曾演展昭的亞視前小生甄志強（小強），當年出道時條件不錯，因為情關令演藝事業卻步，小強98年爆出戀上年長23年的名媛趙金卿，兩人拍拖去ball，由於女尊男卑，他被形容為「二打六」，這段姊弟戀轟動一時，不過，二人關係只維持兩年多，最終分手收場。小強星途平平，他選擇淡出幕前，北上深圳開茶餐廳，也試過到上海做生意，及至16年再返香港發展，信佛的小強參加了不少慈善活動，他去年還創立「香港藝苗會」，以培訓各類演藝文化藝術及體育運動的年輕人。
小強今年初製作了音樂劇《難兄難弟》，反應熱烈，該劇未及半年就再重演，他日前接受《蘋果》專訪時說：「想盡能力供給下一代同弱勢社群正能量。」他認為賺錢不是最重要，即使蝕錢倒貼都沒問題。生得高頭大馬的小強是運動好手，除了近年做高爾夫球教練外，他自幼曾學跆拳道，更是黑帶高手，根據資料顯示，他於89年更是香港跆拳道代表隊（中量級別）首席成員，同年底代表香港參加於韓國首都舉行的「第九屆世界跆拳道錦標賽」，最終16強止步。
小強自從95年接拍亞視拍劇《包青天》一場凌空打後空翻動作，不慎失重心跌落在地上，左手掌壓在地上時，無情力致令左手手掌的軟骨折斷，小強傷手後開始疏於練習跆拳，及至訪問當天，他興之所至，穿上跆拳服現身道場，這個熟悉的環境，讓小強勾起不少回憶，他跟師兄弟們切磋拳術時說：「記得當年15、16歲開始學，因為學時唔係細個，筋冇咁鬆，學起嚟都難，而家少練更事倍功半，以前一星期學三日，放學就去練。跆拳道好講禮貌，細細個成日鞠躬，尊重長輩，對我日後做人好有幫助。」
小強當年選擇了演藝事業，放棄在跆拳道上繼續前行，「今日諗番都冇後悔，每個人喺唔同階段會接觸唔同嘢，每個人都會有唔同人生經歷。我入行都可以見到好多大明星，當年正職仲做酒店，有機會先入行，想轉另一個工作試吓，從冇諗要上位同發圍。最多謝亞視畀咗好多機會我，作為新人畀我揣摩角色，蕭笙、楊紹鴻同蕭建鏗等監製導演都係我嘅伯樂，佢哋敬業樂業，冇分大細彼此，大家圍埋只求將啲戲做好，好似一個大家庭。」小強離開亞視，也曾入過無綫，離開時就淡出娛圈搞飲食生意，先後在元朗和深圳開過茶餐廳，後來都結業。小強自問是良心老闆，在內地搞食肆，因為選用都是優質食材，所以賺取利潤較低：「香港人對食有要求，擺唔到入自己口，我唔會畀人食，好多國內餐廳用廉價油同食材，我做唔出，兜兜轉轉做咗6、7年，成本同收入兼顧唔到，我就決定賺少少離場。」
小強索性再把基地搬回香港，他說：「最初返嚟香港時，我停咗一排，我係佛教徒，我做好多探訪，行返出嚟，對呢個城巿感覺有少少唔同，見到香港樓價好高，陌生唔係大因素，覺得呢度現實咗。」小強經過人生起跌，更珍惜現在擁有的一切，他希望用自己的能力回饋社會：「只係能力範圍，心態轉變，唔係話搵好多錢，夠生活囉，冇話最風光，個個人嘅人生都有高潮低潮，我最高潮係喺亞洲電視，唔係話得到咩知名度，係畀到我人生嘅感覺，我喺亞視大家庭，演戲過程學習到好多嘢，學習到溝通。而學跆拳要體力，有血有汗。當年拍《包青天》一個後空翻，左手受傷要做手術，直到而家手入面都鑲咗粒螺絲，呢一切一切都畀我好多人生回憶。亞視工作係最燦爛嘅日子，而家未係收成，但可以回饋社會，有時賺錢係左手嚟右手去，中間搵個飯盒食。」小強還打比喻，「可以話我以前好鍾意食海鮮，搵10蚊使7、8蚊，食得多海鮮，有一日去食白粥、油炸鬼仲開心。」小強享受知足常樂和平淡是福，他說：「經過高山低谷，可能而家睇化咗，學佛會明白放下，以前真係唔明，原來人係咁，到咗某個階段『叮』一聲，以前我會好火爆，而家會一笑置之，發覺行到咁，靜一靜，諗一諗，乜嘢都可以拋諸腦後，如果一嬲，再嬲10年，就會10年唔開心，如果唔嬲，嗰10年可以好開心生活。」
小強現在對世事都看化了，也不介意被人重提跟舊愛趙金卿的戀情，這段戀情已分手19年，趙金卿現年都70歲，一早已成過去，小強說：「我都十幾廿年冇見佢（趙小姐），希望佢身體健康，我都幾十歲，唔介意講番，我哋曾經係發展過一段唔知點解嘅愛情，過咗某段時間就無疾而終，喺我年輕時係想有段轟轟烈烈嘅愛情，過咗轟烈，而家希望將來可以搵到一段刻骨銘心嘅愛情。」小強所言似乎甚為期待，到底出現了嗎？他答：「唔知出現咗未？如果有，即管嘗試吓，以前細個希望愛情好浪漫，而家希望可以天長地久，希望可以搵到一個同我細水長流嘅伴侶，相愛好容易，相處好困難，我而家係single，當然希望搵到個更加筍嘅筍盤，我擇偶係冇乜嘢條件，隨緣喇，我冇刻意去搵，年輕有期盼，而家只想可以搵一個真正共處嘅另一半，對方唔使靚女。」
採訪：比華利
攝影：沈健程
攝錄：廖達燊
-----------------------------
【每周送10萬】
升級壹會員獨家尊享，立即參加10萬火急大抽獎!
*推廣生意的競賽牌照號碼：52302-9
-------------------------------
錶迷必讀！
89頁腕時計電子書 66款嚴選年度新錶
https://hk.adai.ly/e/v7jEA0MC1X
|
鍾意就快D Share啦！
|
|
|