鄭秀文（Sammi）前晚於紅館舉行「#FOLLOWMi 世界巡迴演唱會」頭場，Sammi日前經歷安心事件，令一班歌迷非常擔心。不過Sammi仍努力排練，在台上表現開朗，還不慎爆粗尷尬儍笑，身為基督徒的她說：「喺我好大好大困難嘅時候，信仰畀我好大力量。」並在台上感謝上帝。
相關新聞：許志安睇完騷即返屋企
鄭秀文相隔三年再踏紅館，舉行一連十三場的「#FOLLOWMi 世界巡迴演唱會」，前晚舉行首場，老公許志安、甘比與囡囡劉秀樺、李嘉欣與老公許晉亨、梁詠琪等也有前往捧場。Sammi以白色巨型婚紗配以18cm高的厚高鞋出場，然後接連換上shocking pink魚尾裙、裸色貼身舞衣及巨型西裝等，就如行fashion show一樣。
Sammi隨後換上超高衩牛仔褲露bra裝，站在吊於半空的傘形裝置，唱畢就說：「你哋嗌啦，我堅決唔嗌，我要養聲。」Sammi隨即說接下來要唱《不要驚動愛情》，又自嘲：「一驚動真係好大鑊㗎，哈。」今次演唱會Sammi提倡以電話app取代螢光棒，她唱到中段時讚歌迷說：「真係少咗螢光棒喎，大家唔怕畀後面揼X。」Sammi驚覺自己不慎爆粗，即尷尬儍笑說：「唔係呀，我係想講揼實呀，你地幫我嘟咗佢呀。」
嘉賓鄭欣宜隨後出場，與Sammi合唱《默契》，Sammi以「今日真正嘅女神」來形容欣宜，又對欣宜說：「你唔好話細細個聽我唱歌呀，不過可能你未出世！」欣宜有點尷尬說：「其實我真係好細個就欣賞你，容許我同你selfie。」兩人嘟嘴面貼面合照。
重現Nike眉
Sammi之後換上中間有巨型閃石十字架的黑色紗裙，還重現第一個演唱會《X空間》上的經典Nike眉，她說：「嗰條乜Ki眉，今年我叫佢做復刻版。」不過經典Nike眉後來竟然甩甩地，最後要工作人員上台搣甩整條眉。
近年Sammi的演唱會都加入不少宗教元素，前晚她提到信仰時說：「喺我好大好大困難嘅時候，信仰畀我好大力量，多謝我嘅God，無論困境都畀好大力量我。」接着便邀請薛凱琪上台合唱《上帝早已預備》。接近尾聲時，Sammi在台上說：「嚟到呢個階段，人生有好多沉澱、好多歷練、好多領悟，所以今次揀咗首慢歌做主題曲。我哋每個人都有自己嘅開心、有眼淚、有痛，但係唔緊要，因為『我哋都是這樣長大的』。」Sammi唱《我》曲時，僅唱出頭幾句已經感動到喊，更一度泣不成聲，淚流滿面。
隨後的encore部份，Sammi換上白色運動背心和dancer上台，她問觀眾有沒有想聽的歌，但觀眾沒表態，她就說不唱歌，只跳舞，然後脫下白色背心變成紅色運動裝，跳唱《螢光粉紅》，為演唱會畫下完美句號。
相關新聞：【街訪】歌迷畀足100分
不甘食老本
演唱會過後，Sammi在Ig寫下心聲：「夢想，令我心中有團火去做得更好更進階，不甘於只吃『所謂老本』的格式，在演出上力求再提升，mi和整個團隊花了極多時間去思考，而mi亦相信自己這次可以呈現出很多的不一樣。」梁詠琪也在Ig寫觀後感：「非常精采！Sammi 120分演出。#跳傘一出即喊 #我們都是這樣長大又喊。」
採訪︰王連連、盧妹
攝影︰沈健程、仇志德
鄭秀文「#FOLLOWMi演唱會」歌單
1《終身美麗》
2《裸體早餐》
3《不要》
4《顏色…氣味》
5《十誡》
6《傷》
7《世界之最》
8《宿命主義》
9《跳傘》
10《不要驚動愛情》
11《千年如一日》
12《默契》（與鄭欣宜合唱）
13《女神》（與鄭欣宜合唱）
14《男仕今天你很好》
15《叮噹》
16《Power of Love》（與鐵樹蘭合唱）
17《煞科》（與鐵樹蘭合唱）
18《浮雕》
19《衝過去》
20《Creo en Mi》
21《信者得愛》
22 Medley：《最後一次》、《理想對象》、《不拖不欠》、《如何掉眼淚》、《如果你有事》、《親密關係》
23《上帝早已預備》（與薛凱琪合唱）
24《我們都是這樣長大的》
25《螢光粉紅》
|
鍾意就快D Share啦！
|
|
|
