入行近50年的盧宛茵（Madam Lo）前晚在旺角處女下海開騷，又唱又跳兼演趣劇。不過Madam Lo也在台上展現感性一面，自言當年離婚令仔女在破碎的家庭下長大，落淚自責。Madam Lo還自爆曾遭劇集男對手侮辱兼白眼，彈她的演技「冇反應、冇表情」，可惜因為是單親媽媽要養家活兒，只好忍氣吞聲繼續撐下去，幸現在苦盡甘來。
相關新聞：【唔做茵姐】離婚復出變Madam Lo
盧宛茵前晚在旺角麥花臣場館舉行「盧師動眾Madam Show」，宣萱、陸詩韻、黃智賢、尹揚明及林偉等捧場。Madam Lo以徐小鳳經典波點裙造型出場，並獻唱《風的季節》，男舞蹈員中途拿出風機吹着她的裙尾，她即改歌詞唱：「風機通通帶走。」其後Madam Lo請來第二期藝員訓練班同學上台話當年，同學爆她當年有很多「兵」，幾乎日日有人接放學，她笑說：「過去咗唔講啦，𠵱家搵個都冇。」
即打電話辭演
除搞笑外，Madam Lo在台上自爆當年曾被男藝人侮辱白眼辛酸史，她憶述有次拍劇跟劇中老公睇重播，導演示意沒有問題，怎料該「老公」演員突然指着她肆意批評：「喂，咪住，佢演到冇反應、冇表情。」Madam Lo續說：「當時廠內靜晒，有位FM埋嚟問我會唔會補拍一次，但我心諗導演都收貨。跟住我即時行出去，打電話畀監製請辭，提議佢將個角色寫成移民走咗，不過監製極力挽留下我先繼續拍。」
有觀眾即時大叫「開名」、「開劇名」，不過Madam Lo說：「唔好，我都唔記得劇名，我份人大情大性，嬲人嬲唔耐，開名就變成是非，不過我諗如果換成係汪明荃，佢會唔會咁講？」她稱只想帶出演員會在情願及不情願下演出。
相關新聞：圈中囝囝多 申請健力士
自覺虧欠子女
Madam Lo也在台上分享跟子女舊照，她忍不住落淚說：「我段婚姻好失敗，惟有自食其力，離咗婚都要生活，盡自己母親責任供書教學，但咁多年都覺得對佢哋唔住，要佢哋喺破碎家庭中長大。我知道仔女童年過得唔開心，希望佢哋原諒我，咁多年我依然耿耿於懷，好似欠佢哋，一份心債。」當她唱出《心債》時，兩位兒子及兩名孫仔上台獻花。
完騷後，Madam Lo接受訪問，對於被男對手白眼，她只表示對方仍在此行，但已沒有再合作：「當時冇喊，只覺得演員有情緒時，最緊要做好角色，我就堅強做好。」她也承認當時因要養家活兒，故此也要做下去，子女們不知此事。至於跟仔女剖白內心歉意，Madam Lo稱是自己釋懷，仔女事前也是不知情。
採訪：馬建華
攝影：陳慧安
|
鍾意就快D Share啦！
|
|
|
