一連七場《林海峰是但噏HAPPY MONDAY 2019》昨晚於紅館舉行最後一場，入場觀眾一如以往騷前作暖場特別嘉賓，全場齊心叫口號「五大訴求 缺一不可」、「香港人 加油」、「香港警察 知法犯法」等，又大合唱《願榮光歸香港》、《有班警察毅進仔》等，然後全場以掌聲互勉。到來捧場嘉賓有徐天佑、方皓玟、黃美棋、鍾健威等，還有夫妻檔謝安琪與張繼聰、錢嘉樂與湯盈盈、黃馨與馮翰銘，另外林海峰家人亦有坐在觀眾席上，講完媽媽部份，他特別答謝媽媽當年以藤條打他，又擔心好難氹回15歲細囡，因為爆了她的私隱。
林海峰準時八時半現身舞台，全場大叫「林狗 下台」，他便返回台底換衫正式開騷。經過六晚演出，林海峰在台上揮灑自如，但去到講太太及兩個女時，林海峰竟然發台瘟:「佢兩個變成建制派，佢哋黨魁，即係佢太太。我竟然同噚晚一樣click喺呢個位。」當他自我要求回帶講多次時，點知又再出錯，他自嘲「今晚最後一場，仲要錄影，我唔會講兩句講到十點啩。」最後到第四次終於成功，全場拍掌鼓勵。之後又再出錯，他原本要說：「有乜嘢比金錢更重要，就係自由。」講錯成「有乜嘢比自由更自由。」他即自揭又講錯。
來到尾場獻唱環節，林海峰講明放盡去跟，在舞台大跳屯門娜娜及Happy伯的舞，全場歡呼叫encore，他即扮傻忘記唱邊首歌，現場有位女觀眾送花，接過花後，他笑說：「做咗七晚收一紥花，都係經典，其實係咪喺隔離大館（殯儀館）拎嚟。」踏入尾聲時間，穿着金色西裝的黃秋生繼續以黃經理現身，他在台中不時暗嘲香港荒謬現況，他先查問：「咁多人喺現場聚集，係咪合法？」又叮囑大家要及早離開，以免無地鐵坐。當講到辦公室人物，他形容有種高層是「眼細細，着件旗袍，成日講廢話，又人工高，嗰啲叫yellow object。」到葛民輝現身，現場氣氛更熱烈，他們在台上問觀眾是否不走？台下大叫不走，秋生說：「再唔走就放煙，大家唔走唔好打爛公司啲嘢，拎支筆扑你個頭。」秋生為觀眾帶來驚喜，先以口風琴吹「有隻雀仔跌落水」，現場歡呼拍手，秋生笑說：「呢班人咁得意，咁鍾意聽兒歌。」之後再吹奏《願榮光歸香港》，全場觀眾亮起電話燈光，秋生也被眼前燈光嚇呆，最後整個騷在觀眾叫「香港人 加油」下完滿結束。
完騷後，三人於後台受訪，尾場出現甩碌情況，林海峰笑指這便是Live騷，而生命中總會有少少遺憾，他說：「第一場仲差，今晚叫順。」他指太太彭羚下午傳了一個信息給他，是打羽毛球的一句鼓勵說話：「如果有乜錯失，就逐分逐分去追。」在台上擔心激嬲細囡，他表示只是誇大演繹，過一陣便沒事，不過細囡不經意地看了他的稿，真的有要求删走某些內容。
每次開騷都有好拍檔葛民輝助陣，林海峰指阿葛今次好恐怖，因為每日都是全組人中最早抵達紅館，他笑說：「我哋唔好計較佢台上演出，但態度係滿分，其實今次只係安排佢做一陣間，盡量縮短佢時間，咁安全好多，其實佢咁早到係每日做全身檢查。」秋生感激有今次機會在紅館唱足七晚，問到是否在尾場特別吹奏兩首歌送給觀眾？他說:「之前有吹，日日都唔同歌，今晚見到全場燈光都嚇一跳。」林海峰爆料秋生有意舉行演唱會，秋生即表示已打消念頭，因為開騷太辛苦，如要做便在容納30人場地或等到80歲再考慮。現在社會氣氛差，問到開騷是否更難度內容氹觀眾開心？林海峰表示每次開騷度稿都不容易，不過面對困難都仍然要做，身旁阿葛送上四字詞「迎難而上」。
採訪：馬建華
攝影：陳俊強
|
鍾意就快D Share啦！
|
|
|
