【娛樂人物】港台節目《頭條新聞》以嬉笑怒罵形式諷刺香港時弊，矛頭不時直指特首及一眾高官。主持之一的曾志豪多年來三番四次被高官點名批評，他坦言自己非聖人也會害怕，但另方面卻認為此節目的作用正是要揭露社會、政府的不公及醜惡，絕非做應聲蟲對外唱讚歌，故曾志豪表明：「係有驚過，但係冇辦法。」
撰文︰何永寧
攝影︰林德雄
相關新聞：由「和理非」到冇底線
現年41歲的曾志豪在港台《頭條新聞》中扮演「小豪子」、「徐副官」的角色深入民心，原來他大學畢業不久後已在港台任職，他說︰「我係賣服務畀港台，每年都要傾續約，例如2019至2020年度就提供服務畀《頭條新聞》，到期又再簽，我哋唔係公務員，畢竟係政府架構，數目好分明，屬於第一層人工嘅可能係幾百蚊，所謂劉德華嚟都係嗰個價錢，港台唔係商業機構，唔會有好多budget，就算真係華仔嚟拍嘢，可能佢收嘅人工，都係同我一樣。」
| | |
對得住份糧
每年續約無疑是創作人的金剛圈，尤其主持經常同政府針鋒相對的節目，對於這份擔憂，曾志豪表示︰「我覺得我哋唔好話《頭條新聞》，我哋都屬於電視部裏面嘅公共事務，公共事務好明顯係一個專業嘅新聞部門，新聞講嚟講去無論你用邊個形式，報道、紀錄片特輯、定係一種諷刺類別，其實嗰個角色就係一個把關，甚至乎話係一個好似足球比賽中嘅後衞，我哋真係嘗試將大家所指嘅一啲唔公平或者醜惡嘅事揭露出嚟，希望呢啲事唔再出現喺我哋城市及文化裏面，所以監督、批評、提出檢討建議，基本上係我哋要做，所以我哋嘅薪水，好對得住我哋嘅工作。如果你做《頭條新聞》每一集都係話：『嘩！林鄭今日嘅髮型恤得好靚』，我諗老細真係會同你講：『下年真係唔能夠續約』，我哋嘅新聞角色唔係要唱讚歌。」
相關新聞：【蘋聞重溫】《頭條新聞》屢被點名批評
唔敢講港獨
主持《頭條新聞》近14年，曾志豪笑言可能自己層數低，未有任何風雨落在他的身上︰「從來冇試過監製、編導會召你嚟話：『你小心啲呀，真係唔好。』我覺得好幸運，監製就好似我哋創作團隊嘅『李氏力場』一樣，好識得保護我哋，因為我哋做創作或者呢類批評節目，如果聽到呢啲針對意見，你唔係聖人，一定會驚或者會諗係咪唔好講太多，咁你就失去咗效用。係有驚過，你唔係聖人，但係冇辦法。」曾志豪坦言做此類節目如果太多顧慮，節目跟被河蟹根本沒有分別，但他覺得自梁振英年代開始，他們更要小心，特別是「港獨」這條線不能逾越︰「以前所謂最大禁忌都係『六四』、『爭取雙普選』，但係梁振英之後，多咗條線叫做『港獨』，呢條線恐怖過『六四』，唔可以俾人有機會扣你呢頂帽子，所以我哋創作都要留神，唔想有機會俾人話『港獨』，呢個真係唔夠膽，要玩都要好小心。」
感自由收窄
曾志豪覺得香港打從梁振英上任開始，己變得不再熟悉，言論自由被徹底打壓，語氣中多少帶點無奈︰「多年前就算有人話《頭條新聞》陰陽怪氣都好，好快就見到社會輿論有好大迴響。你數番97年時一講完，好快就有人去頂住。又例如林超榮試過諷刺塔利班俾人鬧，但反而大紅，好多人搵佢出書、開講座，證明當時社會好輕鬆，俾人鬧完後，啲人反而覺得你紅，亦知道唔會有嚴重後果。但今時今日俾人針對、開名，已經冇咗以前嗰種調笑『你就發達啦』，𠵱家被點名嘅下一步，可能真係會被除名，𠵱家啲氣氛差太遠。」
70後的曾志豪仔細老婆嫩，大仔四歲、細仔一歲半，一家偏黃的太太陀大仔時正值傘運，經典一幕是老婆挺着大肚，都要到金鐘逛逛。對小朋友的將來，曾志豪說︰「𠵱家我哋點解覺得痛苦？以前搭港鐵，唔會驚佢停站唔行、唔驚會有防暴衝入嚟，𠵱家真係驚，冇做錯都打喎。希望佢哋可以無憂無慮，唔使顧慮自己着乜嘢衫、唔理係咪有病，戴口罩唔使驚俾人話係示威者。我唔知道有冇機會，希望呢個暴風雨會過去，希望我哋嘅將來可以睇到無憂無慮嘅陽光射落嚟。」
|
鍾意就快D Share啦！
|
|
|
