李施嬅近日因《金宵大厦》爆紅，在無綫捱足16年，今年她決心離開無綫跳出安逸定期出糧日子，她在毫無預警下裸辭，換來的卻是更多機會，拍微電影成雙料影后，拍加拿大劇入圍女配角。從未獲得過無綫台慶頒獎禮任何獎項的施嬅，今年成為大熱，但她並不希罕獎項，覺得現在獲得認同，笑說：「每晚臨瞓前都笑住。」
相關新聞：獨立女性 拍拖拒糖黐豆
現年38歲的李施嬅在2003年港姐落選後，加入無綫開始拍劇生涯，默默耕耘下攀上女一之位，但在踏板上難以高飛，離巢後推出主演奇幻劇《金宵大厦》反而令她一躍而上，收視和口碑成為近年無綫劇雙響炮，施嬅走到街上被簇擁，被高呼劇中角色。日前施嬅接受《蘋果》專訪，她直言：「入行以來冇試過呢種感覺，會好珍惜呢個時間。」雖然《金》劇爆紅，但她其實已經離巢半年，更早就在國際大放異彩。
在無綫16年的施嬅，於台慶頒獎禮未得過任何獎項，前年卻憑美國微電影《Once More》，成為European Cinematography Awards及Los Angeles Film Awards雙料影后，去年她參演加拿大電視劇《Blood and Water》，更有份角逐有「加拿大奧斯卡」之稱的「Canadian Screen Awards」最佳女配角，成績有目共賭。至於今年的台慶獎項，施嬅卻認為：「好多人話TVB欠我一個獎，今次畀我嘅鼓勵、認同，比一個獎、一個鐵實物更重要，每晚臨瞓前都笑住。」
離舒適圈挑戰自己
下定決心外闖相信是明智之選，但施嬅曾遭反對：「好多人覺得我唔應該走，出面風大雨大唔係咁容易撈，我就覺得太舒服，想挑戰自己。」施嬅作好準備要孤身作戰：「出咗去就冇得預計，冇底薪，唔知有冇人搵你工作。」然而實力印證一切，離巢半年收入和工作量都大豐收，施嬅一臉滿足笑容：「有工作，見識多咗，仲可以去紐約時裝周行騷，我諗我係最矮一個model。加拿大套劇有意開續集都有搵我，但要睇期，雖然前路睇唔到，但我深信係好。」接下來她會繼續發展國際市場，接拍西片，享受現時自由身工作。
時來運到，離開無綫後作品反成最大迴響，究竟是過往運氣欠奉還是時機降臨？施嬅亳不猶豫說：「每樣嘢發生有原因，臨走前五年，我拍好少劇，令我有更多機會去闖去試其他嘢，擴闊咗我視野，出去闖需要更多鼓勵同膽量，呢個劇同階段令我壯膽。」施嬅在《金》劇的表現，獲網友激讚她演技大躍進，她也歸功於在外地拍劇：「拍呢套劇前我喺加拿大拍完《Blood and Water》，演一位殺人黑警，緊接就開呢套，可能吸收咗外國演技。」
相關新聞：【蘋聞重溫】台慶頒獎禮冇獎拎
試鏡失敗易受打擊
為爭取工作，施嬅無懼挑戰，能夠衝出國際全因試鏡擊敗對手，背後有苦自己知：「去出面casting（試鏡）面對失敗打擊都幾難受，因為香港係點名做，唔使casting，當你試完唔得，你會懷疑自己唔夠好，你唔會知自己乜嘢唔得，需要一個強壯心同膽衝出去。」面對外國市場，施嬅認為最大困難是競爭：「冇劃分種族幾萬人都有，就好似睇電影《星聲夢裡人》（La La Land）一樣，有人喺美國做緊侍應生、超市收銀，但佢哋日日都係做呢樣嘢，被拒絕都仲試緊。人哋冇我咁幸福，我有少少名氣，可以賺到錢去生活，佢哋可能每月剛剛好，夠食夠住去追夢。」
場地提供：The Stadium（觀塘）
髮型：Jay@Hair
|
鍾意就快D Share啦！
|
|
|
