曾到警總撐警的「荷蘭叻」陳百祥，早前與明星足球隊等人，同解放軍拖手踢波迎中秋，今日網上流出一條影片，見荷蘭叻與老婆黃杏秀到疑似警署，為警務人員送上奶茶及燒鵝等慰勞警隊，撐警心不滅，現場更有不少警察圍埋聽荷蘭叻發言，而前日（16號）網民在facebook群組已上載荷蘭叻與警察的合照，相中見他和8位身穿防暴警察服飾、5位身穿制服的警察影更臉露笑容，舉起Like手勢合照。
一向語出驚人的荷蘭叻探警察時，竟然鼓勵警員開真槍，又指如果他做警務處長，兩個月前已開真槍，在影片一開始，他說：「靠你哋，最後嗰條防線就係你哋，成個香港而家你哋睇住，我唔知香港其他部門點樣睇，我覺得只有警察係唯一最正義、最識道理，其他部門好似幫唔到你哋手咁，我哋呢啲普通市民只可以喺心度支持你，同埋我就一早行出嚟撐你哋，但係我超咗齡，輔警都做唔到，如果唔係，就喺大家左右一齊做，1968年考差人，我諗我都大過晒呢度所有嘅人，因為我都奔緊『七』（就嚟70歲），今年69歲，仲係可以喺警察部成日同你哋啲同事踢波，因為我近旺角，我教出嚟嗰啲足球員係你哋啲教練，不過個個都退晒役。
「最重要係個心，知道大家真係辛苦晒，我係百分百支持你哋，覺得你哋好偉大，佢哋唔止係搞你哋，仲搞埋屋企人，呢啲係完全……我喺香港出世，嗰47年英殖時代，我都未見過，到回歸呢廿年，更加未見過，我係諗都諗唔到香港會係咁。當然係好多嘢出咗問題，教育、成個社會出咗問題，但係冇辦法，就靠你哋去守最後呢條防線，希望你哋繼續，我希望唔使繼續，但冇辦法，暫時都要繼續，我覺得係近尾聲，大家再頂埋呢十日、八日左右，我諗！」
這時候全場笑晒兼鼓掌，陳百祥續道：「過咗國慶，習近平比較得閒，呢個係好公道，佢哋成日話解放軍，其實冇可能係解放軍，因為解放軍係對外敵，就算喺內地都係，軍隊係向外，所謂嘅公安，即係你哋呢班警察係對內，我哋香港內部嘅事情，一定係內部去解決，個問題係幾時解決，即係如果我做警務處處長就好喇！兩個月前已經開咗真槍，就好快解決，不過你哋仲係好忍得，我真係覺得你哋好忍得，俾人掟完汽油彈都唔開真槍，真係好忍得，冇辦法，辛苦晒、辛苦晒大家！」
不少網民感到嘩然難接受，又指荷蘭叻又吹捧自己，批評他鼓勵警員開真槍，有網民覺得無論任何情況：「如果陳百祥企我呢邊，我都覺得好x……但係 popo好受落」、「話冇部門幫到手，只有警察，阿叻呢句毒到呢，將全個政府同警察對立」、「佢做警務處長，可能兩日就輸晒啲錢無糧出」。]
| 荷蘭叻早前探警察時，竟然鼓勵警員開真槍。（網上截圖） | | |
|
鍾意就快D Share啦！
|
|
|
