2019年12月3日星期二

【頭條獨家】自爆曾被「鹹濕婆」非禮江嘉敏學跆拳道防狼 __,江嘉敏,

【頭條獨家】自爆曾被「鹹濕婆」非禮江嘉敏學跆拳道防狼

江嘉敏拎完跆拳道黃帶，𠵱家努力進階中。

TVB上位小花江嘉敏（Kaman）下個月才開劇，難得輕鬆放大假，Kaman卻選擇學嘢增值自己，啱啱報考電單車1 take pass強制試，又學緊跆拳道，上咗幾堂經已去到黃帶級數，她一臉滿足地說：「學完可以健康啲，必要時又可以防吓狼！」原來入行前她試過喺港鐵車廂被摸Pat Pat，摸她的竟然是一位姨姨咁款嘅「鹹濕婆」，因為呢段不快經歷，提醒她要去保護一吓自己。採訪：方騫平

25歲的江嘉敏多才多藝，以前就學彈琴、畫畫，長大後就學跆拳道、揸電單車，全部都係自己想學的，尤其跆拳道，拍劇都有用，「之前拍《誇世代》時我畀張繼聰撻過，又撻過對手，感覺相當過癮，所以好想去學。啱啱上堂時打到成個人散咗，不過真係瘦咗，條腰少咗1吋，本想學埋埋身戰術，但男友Anthony唔批准，話要預埋佢先好去學，所以我改咗學好有型嘅踢板，學跆拳道佢又唔怕我變粗魯，哈！但返屋企，我都有拎佢個patpat當沙包踢嚟練習㗎！」

呢世都記得

問到可曾試過被性侵，所以要學防狼術？Kaman坦言入行前試過喺港鐵被非禮，真係講起都嬲爆：「當時車廂都幾迫，有個正正常常look嘅『姨姨』摸我條腰再摸我patpat，因為對方係女人，我不以為意，以為太迫佢先會掂到我，跟住我就喺下一站，行咗去下一卡車廂，點知佢跟埋嚟，過一陣又再摸，我咪開聲問：『摸夠未？』點知仲畀佢大大聲鬧返轉頭：『我係女人，點會摸女人？你有病就去睇醫生』真係嬲死我呀，佢鬧完我之後就落車，擺明係心虛。(當時著短裙仔好誘人？)唔係呀，著tee同牛仔褲。」呢件事令她留下永不磨滅記憶。