《蘋果驗樓》今集驗收恒地（012）西營盤翰林峰一個224方呎劏房，詹濟南「詹Sir」對特首林鄭月娥、立法會主席梁君彥、警察公共關係科高級警司江永祥等人逐一抽秤，包括「漆婆亂咁嚟」、「樑均現唔持平」、「光永牆金玉其外」。至於單位交樓質素，恒地今次委聘中國建築旗下中海房作為承建商，有別於以往恒地旗下子公司承建，交樓質素高下立見，未計此單位詹Sir團隊已驗收3伙，得分由50多分至60多分，今次驗收單位76分暫時最高分。
今次驗收翰林峰5座中層戶，實用224方呎，從事金融業的業主陳生於2017年以約660萬元買入，「呢個單位向南，望港大，環境安靜，想讀書，想入港大，或者想吸收多啲書卷氣，係幾好嘅地方，又有綠油油山景，樓下有會所又近地鐵站。無論外籍人士、中環白領、港大或附近讀書嘅人都適合租呢度……同埋地契999年，地租會平啲，幾乎唔使點畀。地方都唔算好細，200幾呎都叫超過劏房水平。」這些都是他買入單位的原因。
記者在詹Sir入單位前，用心心夾「捐畀手足」字條的100元現鈔藏於廁所假天花上。大門旁就是廁所入口，詹Sir到埗，就見廁所假天花生口位閂唔埋。他企上打開生口位檢查說：「無嘢呀！（入面有無垃圾？）乜嘢都無，（使唔使摸吓周邊？）邊位有釘頭，其他業主要小心。睇假天花入面，要睇吓啲喉有無漏水，而家無漏嘅。不過蓋面閂唔埋，屬於瑕疵，要扣分。」由於他企上去路線與記者原先路線有別，現鈔所放位置變成他盲眼位，未有即時發現。記者臨時補飛，稱想學習如何檢查假天花，企上去趁他不為意時，漫不經意地把現鈔掃落地面，詹Sir隨即發現有物品從天而降，便說：「嘩！100蚊紙，拍硬檔，蘋果幫手捐畀手足。我一定唔會據為己有。」
入到廳房合一僅約100方呎空間，他升級變身「黃金驗樓師」，間接批評特首林鄭月娥，「有時啲漆婆亂咁嚟，我指油漆婆。曾經碰過一個漆婆，係又譴責，唔係又譴責，人哋過砂紙又話人磨損，一味叫人檢討，自己都唔知發生咩事。所以我成日都話，最緊要知咩事，要獨立調查。漆婆做得咁差，都要繼續做落去，因為啲人都要髹油㗎，係難為住喺入面啲人。」
講完油漆，又講牆身及橫樑，暗寸立法會主席梁君彥及警察公共關係科高級警司江永祥，「橫樑應該要平均咁表現出來，簡稱『樑均現』，結果橫樑唔持平，側埋一邊。均衡、持平先係好樑，而家大肚、不平衡，唔係一條好樑，做得咁差，拆鬼咗佢。上樑不正，嗯……睇吓下牆，都歪嘅。」所指下牆歪，是高低不平橫樑旁油漆粗糙。靠近開放式廚房一邊是剪力牆，又稱結構牆，他就指：「呢幅係永久嘅牆，表面仲光光滑滑呀，係幅『光永牆』，有時驗樓要小心呢啲『光永牆』，隨時會出現金玉其外，敗絮其中，特別近窗邊有水迹。」開放式廚房選用伸縮水龍頭，「開住熱水時，水管膨脹咗，伸縮無咁順，一味搏命搏力拉係無用嘅。要用『涼滋』，即係用涼水滋潤吓條管，涼涼地滋潤吓，你睇，支伸縮管就好容易收埋。咪住，睇吓有無啲『涼響』先，涼水造成嘅響聲，有啲人聽到會覺得唔順，覺得太唔合理，涼咋嘛，點會響㗎？」
詹Sir結果單位驗樓得分76分，其中欄杆零分，因為漏了兩條瀄膠，油漆扣40%分因多處粗糙，窗扣一半分因玻璃崩花、瀄膠有窿，「仲有條膠揈揈下」。他旗下團隊早前已驗收此盤3個單位，分數由50多至60多分，主要由於鋅盆、去水喉漏水。對於寫上「捐畀手足」的100元現鈔，他說：：「我加多一嚿！（其實我哋整蠱你，你有無覺可疑？）梗係可疑，邏輯上無可能擺張銀紙係嗰度……（即係一早睇穿我哋？）係啦，你畀我，我係唔會要嘅，亦唔會令我貪心嘅，我係唔會驚嘅……啲錢。」然後他隨即在銀包取出另一張100元並謂：「我加多一嚿，捐畀手足。」
恒地發言人回覆，有關上述單位的所有需要執修的項目已完成修繕，將與業主保持溝通，盡快安排業主到場驗收。
樓盤租賃方面，利嘉閣地產黃祥勇表示，此盤5座低層C室，實用面積216方呎，以1.5萬元租出，呎租約69元。業主於2017年5月以595.3萬元買入，租金回報率逾3厘。本月屋苑暫錄4宗租務成交，現時有80個單位放租，租金叫價由1.6萬元起。
|
鍾意就快D Share啦！
|
|
|
