胡敏珊14歲入行做模特兒，20歲出頭，跟當年男友一起打造潮牌手錶，試過一年有2億生意，被視為鐘錶界女神，智慧與美貌並重，再加努力，胡敏珊當年極速在名人圈成為焦點。
其後她創辦個人手錶品牌，宣傳攻勢十分成功，卻遇上金融風暴，胡敏珊被逼結束所有店鋪，損手離場。
事業遭滑鐵盧，07年，母親在27樓寓所墮樓亡是另一個心結。自小跟母親感情要好的胡敏珊深受打擊，有報導指當日胡母情緒激動，縱使胡敏珊跟友人都在家，未能避免悲劇發生，十三年來，她都盡量廻避，鮮有觸及痛處。
「媽媽過世，令我思考自己真正需要，當失去最愛親人，便感到時間重要。媽媽突然離開，令我覺得成功唔係人生全部，只係人生一部份，最重要係做人心態同點面對自己，我學識知足同唔再執着。」胡敏珊罕有提起。
胡敏珊朋友都說這是個悲劇，但在她心中，反而慢慢成為一股推動力，她說：「與其在家喊，不如想吓媽咪生前最想自己做咩，媽咪好鍾意幫人，我覺可以將佢呢份愛延續，所以成立咗一個慈善基金幫人。」胡敏珊言行一致，因她剛與溫碧霞合作，推出了新唇膏，將收入一半損出，為白內障病人做手術。
「人生最開心反而是最低潮時候，嗰段時候，我喺印度，到過十幾個城巿，經常撫心自問，
點解當地人比我笑得更開心。我望住佢哋，然後我諗當地人做十世人，都未必有我咁多機會，同埋可以做到咁多嘢。我發現自己原來從來唔識感恩，遇到小小挫折就怨天尤人。」她說。
步伐放慢，然後再重頭再來。近年，胡敏珊又搞健康產品生意，她說：「我係一隻打不死獅子，朋友都話我變咗好多，好似另一個人，即係破繭而出。以前我唔鍾意笑，而家唔同晒，你叫我唔笑都唔得。其實無論幾聰明，幾咁成功，但冇笑容，咁又有咩意思！我問自己，如果賺到錢，但已經唔識笑，咁搵錢目的又係為咗咩呢？」
----------------------------
【壹週刊 武漢肺炎專頁】
緊貼防疫資訊！口罩訂購情況、確診個案、病徵潛伏期、封關國家名單、保險點賠？
與你遠離瘟疫 睇清官謊！
立即睇
-----------------------------
【壹週刊直播平台 ChannelNEXT】
專家教你自保攻略｜口罩點揀｜防疫點做
立即睇
-----------------------------
疫情追蹤，最新消息，Follow 壹週刊Telegram：
點擊追蹤
來源 source: http://nextplus.nextmedia.com
|
鍾意就快D Share啦！
|
|
|
